امریکی منصوبے پر مسلم ممالک کے مشترکہ بیان کا خیر مقدم

دفترِ خارجہ کے مطابق پاکستان، اردن، متحدہ عرب امارات، انڈونیشیا، ترکیہ، سعودی عرب، مصر اور قطر نے مشترکہ بیان جاری کیا ہے۔ ترجمان کے مطابق وزرائے خارجہ نے امریکی صدر ڈونلڈ ٹرمپ کی قیادت اور امن کے لیے کی جانے والی کوششوں کا خیر مقدم کیا۔ غزہ میں جنگ بندی، فلسطینی عوام کی بے دخلی کے خاتمے اور امن کی بحالی کے اعلان کو مثبت قدم قرار دیا گیا۔ بیان میں کہا گیا کہ مسلم ممالک نے امریکا کے ساتھ امن کی شراکت داری پر زور دیا اور خطے میں امن، سلامتی اور استحکام کے عزم کو دہرایا۔ وزرائے خارجہ نے دو ریاستی حل کی حمایت، آزاد فلسطینی ریاست کے قیام، غزہ کی تعمیر نو اور اسرائیلی افواج کے انخلا پر زور دیا۔ ساتھ ہی معاہدے پر مکمل عمل درآمد کے لیے ہر ممکن تعاون کی یقین دہانی کرائی گئی۔