قومی کھلاڑیوں کے غیر ملکی لیگز کے لیے این او سی معطل

ایشیا کپ فائنل میں شکست کے اگلے ہی روز پی سی بی نے غیر ملکی لیگز کے لیے جاری تمام این او سی معطل کر دیے۔ پی سی بی کے چیف آپریٹنگ آفیسر سمیر احمد نے باضابطہ نوٹیفکیشن جاری کر دیا ہے۔نوٹیفکیشن کے مطابق غیر ملکی لیگز کے لیے دیے گئے این او سی کو فوری طور پر ہولڈ پر رکھا گیا ہے۔ اس فیصلے سے پاکستان کے بڑے کرکٹرز متاثر ہوں گے، جن میں بابر اعظم، شاہین شاہ آفریدی، محمد رضوان اور فہیم اشرف شامل ہیں، جنہیں حال ہی میں بگ بیش کے این او سی جاری کیے گئے تھے۔ پی سی بی کے اس اقدام نے شائقین اور کرکٹ حلقوں میں نئی بحث چھیڑ دی ہے کہ آیا یہ صرف وقتی معطلی ہے یا مستقبل کی کسی بڑی حکمتِ عملی کا آغاز۔