نیشنل سائبر کرائم انویسٹی گیشن ایجنسی (این سی سی آئی اے) نے مشہور یوٹیوبر رجب بٹ کے خلاف سخت کارروائی عمل میں لاتے ہوئے ان پر الزام عائد کیا ہے کہ وہ سوشل میڈیا پلیٹ فارمز کے ذریعے عوام کو جوا اور سٹے بازی سے منسلک غیر رجسٹرڈ ایپس میں سرمایہ کاری پر اکساتے رہے، جس کے نتیجے میں درجنوں افراد اپنی جمع پونجی سے محروم ہوگئے۔ این سی سی آئی اے کی جانب سے درج کی گئی ایف آئی آر میں مؤقف اپنایا گیا کہ رجب بٹ نے مختلف ویڈیوز اور اشتہارات کے ذریعے ایسی ایپس کی پروموشن کی، جو قانونی طور پر رجسٹرڈ نہیں تھیں۔ ان ایپس میں سرمایہ کاری کرنے والے متعدد شہری شدید مالی نقصان اٹھانے پر مجبور ہوئے۔ ایف آئی آر میں مزید انکشاف کیا گیا کہ رجب بٹ ایک مشہور بیٹنگ ایپ بینومو کے برانڈ ایمبیسیڈر کے طور پر سرگرم تھے، حالانکہ یہ ایپ کسی مجاز ادارے کے ساتھ رجسٹرڈ نہیں ہے۔
ایجنسی کے مطابق بارہا نوٹس جاری کیے جانے کے باوجود رجب بٹ نے تفتیشی عمل میں تعاون نہیں کیا، جس پر ان کے خلاف قانونی کارروائی ناگزیر ہوگئی۔ این سی سی آئی اے اور این آئی اے کی جانب سے جاری بیان میں کہا گیا کہ غیر قانونی آن لائن جوئے اور سٹے بازی کے مکمل خاتمے کے لیے ملک بھر میں کریک ڈاؤن جاری ہے تاکہ نوجوان نسل کو مالی دھوکہ دہی اور سماجی برائیوں سے بچایا جا سکے۔ واضح رہے کہ اس سے قبل 17 اگست کو بھی این سی سی آئی اے نے ایک بڑی کارروائی میں علامہ اقبال انٹرنیشنل ایئرپورٹ سے معروف یوٹیوبر سعد الرحمان ذوالفقار المعروف ڈکی بھائی کو گرفتار کیا تھا۔ ان پر الزام ہے کہ وہ آن لائن ٹریڈنگ اور جوا کھیلنے والی غیر رجسٹرڈ ایپس کے ذریعے مالی فراڈ اور تشہیری سرگرمیوں میں ملوث تھے۔
Discussion about this post