سری لنکن آل راؤنڈر دونیتھ وللاگے ذاتی سانحے سے دوچار

ایشیا کپ 2025 کے دوران سری لنکا کے نوجوان آل راؤنڈر دونیتھ وللاگے ایک بڑے ذاتی سانحے سے گزر گئے۔ ان کے والد سرانگا وللاگے دل کا دورہ پڑنے کے باعث انتقال کر گئے۔ میڈیا رپورٹس کے مطابق افغانستان کے خلاف میچ کے دوران وللاگے کو اس افسوسناک خبر سے لاعلم رکھا گیا، تاہم میچ ختم ہونے کے بعد سری لنکن ہیڈ کوچ اور سابق کپتان سنتھ جے سوریا نے کھلاڑی کو والد کے انتقال کی اطلاع دی۔ سوشل میڈیا پر وائرل ایک ویڈیو میں دیکھا جا سکتا ہے کہ جے سوریا وللاگے کو یہ خبر سناتے ہوئے دلاسہ دے رہے ہیں۔

والد کے انتقال کے بعد دونیتھ وللاگے فوراً سری لنکا روانہ ہو گئے ہیں، جس کے باعث ان کی ایشیا کپ کے بقیہ میچز میں شرکت مشکوک ہو گئی ہے۔ سری لنکن کھلاڑیوں اور شائقین کرکٹ کی جانب سے نوجوان کرکٹر کے ساتھ تعزیت اور ہمدردی کا اظہار کیا جا رہا ہے۔ کمنٹری کے دوران سابق کرکٹر رسل آرنلڈ نے انکشاف کیا کہ مرحوم سرانگا وللاگے خود بھی اسکول کرکٹ کے نمایاں کھلاڑی تھے اور پرنس آف ویلز کالج کی قیادت کر چکے تھے۔ ان کا کہنا تھا:
"یہ خبر انتہائی افسوسناک ہے، ہماری ہمدردیاں اور دعائیں وللاگے کے خاندان کے ساتھ ہیں۔ ٹیم کا ماحول بہت جڑا ہوا ہے، اور امید ہے یہ دکھ سب کو مزید قریب لائے گا۔”

کرکٹ کے اعتبار سے بھی وللاگے کا میچ یادگار نہ رہا۔ انہوں نے 4 اوورز میں 49 رنز دیے اور صرف ایک وکٹ حاصل کی، یہاں تک کہ محمد نبی نے ان کے ایک اوور میں 5 چھکے جڑ دیے۔ تاہم افغانستان کی بھرپور کوششوں کے باوجود جیت سری لنکا کے حصے میں آئی۔ مرحوم سرانگا وللاگے اگرچہ قومی ٹیم کی نمائندگی نہ کر سکے، لیکن اسکول کرکٹ میں ان کا نام ایک نمایاں کھلاڑی کے طور پر یاد رکھا جاتا ہے۔