دبئی ورلڈ ٹریڈ سینٹر میں 15 تا 17 ستمبر منعقدہ آئی ایس ایم مڈل ایسٹ 2025 میں پاکستان پویلین کا افتتاح پاکستان کے قونصل جنرل دبئی جناب حسین محمد اور ٹریڈ اینڈ انویسٹمنٹ کونسلر جناب علی زیب خان نے کیا۔
ٹریڈ ڈویلپمنٹ اتھارٹی آف پاکستان (TDAP) کے تحت دو ادارے جبکہ 17 دیگر پاکستانی کمپنیاں اپنی مصنوعات کو انفرادی طور پر پیش کر رہی ہیں۔ پاکستانی کمپنیاں اعلیٰ معیار کی کنفیکشنری، بیکڈ اور منجمد مصنوعات، بسکٹ، کیک، چاکلیٹس، کینڈی، چپس اور اسنیکس کی متنوع رینج کو نمائش میں پیش کر رہی ہیں۔ اس موقع پر پاکستان کے قونصل جنرل حسین محمد نے کہا کہ آئی ایس ایم مڈل ایسٹ میں پاکستان کی شرکت عالمی کنفیکشنری اور اسنیکس انڈسٹری میں ہماری بڑھتی ہوئی صلاحیت کی عکاسی کرتی ہے۔ انہوں نے مزید کہا:
"پاکستانی کمپنیوں کی موجودگی اس بڑے پلیٹ فارم پر ہماری مصنوعات کے معیار، تنوع اور مسابقت کو اجاگر کرتی ہے اور متحدہ عرب امارات، مشرق وسطیٰ اور دیگر خطوں کے ساتھ تجارتی روابط کو مزید مستحکم کرنے میں مدد دیتی ہے۔ ایسے مواقع پاکستانی برآمد کنندگان کے لیے عالمی منڈیوں میں نئی راہیں کھولیں گے۔”
ٹریڈ اینڈ انویسٹمنٹ کونسلر علی زیب خان نے کہا کہ دنیا کی سب سے بڑی کنفیکشنری اور اسنیکس ٹریڈ نمائش میں شرکت پاکستانی کمپنیوں کو عالمی منڈیوں تک رسائی اور کاروباری تعاون کو بڑھانے کا بہترین موقع فراہم کرتی ہے۔
اس سال کی نمائش میں 60 سے زائد ممالک کے 700 سے زیادہ نمائش کنندگان شریک ہیں۔ مشرق وسطیٰ اور شمالی افریقہ (MENA) کا خطہ اسنیکس کے استعمال میں مسلسل سال بہ سال نمایاں اضافہ کر رہا ہے، جس کی وجہ سے یہ صحت دوست، ماحول دوست اور ثقافتی طور پر موزوں اسنیکس کے حوالے سے تیزی سے ترقی کرنے والی منڈیوں میں شمار ہوتا ہے۔
Discussion about this post