امریکا : 32 غیرملکی ادارے تجارتی پابندیوں کی فہرست میں شامل

امریکا نے اپنی نئی پالیسی کے تحت 32 غیر ملکی اداروں کو تجارتی پابندیوں کی فہرست میں شامل کر لیا ہے۔ خبر ایجنسی کے مطابق ان اداروں میں سب سے زیادہ 23 کا تعلق چین سے ہے، جبکہ بھارت، ایران، ترکیہ اور متحدہ عرب امارات (یو اے ای) کے ادارے بھی اس فہرست میں شامل ہیں۔ امریکی محکمہ تجارت کا کہنا ہے کہ یہ ادارے ایسی سرگرمیوں میں ملوث ہیں جو امریکا کی قومی سلامتی اور خارجہ پالیسی کے لیے خطرہ تصور کی جاتی ہیں۔ نئی پابندیوں کے بعد امریکی کمپنیوں اور شہریوں کو ان اداروں کے ساتھ کسی بھی قسم کے تجارتی لین دین سے روک دیا گیا ہے۔

ماہرین کی رائے

تجزیہ کاروں کا کہنا ہے کہ ان پابندیوں سے نہ صرف امریکا اور چین کے درمیان جاری تجارتی کشیدگی میں مزید اضافہ ہوگا بلکہ بھارت، ترکیہ، ایران اور یو اے ای جیسے خطے کے اہم ممالک کے ساتھ تعلقات پر بھی نمایاں اثرات مرتب ہو سکتے ہیں۔