بولی وڈ کی معروف اداکارہ اور سابق حسینہ عالم ایشوریا رائے نے اپنی تصاویر، آواز اور دیگر مواد کےبغیر اجازت استعمال پر متعدد آرٹیفیشل انٹیلی جنس (اے آئی) پلیٹ فارمز کے خلاف دہلی ہائی کورٹ میں درخواست دائر کردی ہے۔ درخواست میں مؤقف اختیار کیا گیا ہے کہ یہ پلیٹ فارمز اداکارہ کی اجازت کے بغیر ان کی تصاویر اور آواز کو فحش اور نامناسب ویڈیوز و گرافکس میں استعمال کر رہے ہیں، جس سے ان کی ساکھ کو نقصان پہنچ رہا ہے اور کردار کشی کی جا رہی ہے۔
اداکارہ نے اپنی درخواست میں جعلی ویب سائٹس اور ای-کامرس پلیٹ فارمز کی فہرست بھی جمع کرائی ہے جو ان کا نام اور آواز استعمال کرکے مصنوعات بیچ رہے ہیں۔ ایشوریا رائے نے عدالت سے استدعا کی ہے کہ ان پلیٹ فارمز کو فوری طور پر روکا جائے۔ تاہم، انہوں نے فی الحال کسی بھی پلیٹ فارم سے ہرجانے کا دعویٰ نہیں کیا بلکہ صرف استعمال پر پابندی لگانے کا مطالبہ کیا ہے۔ عدالت نے ابتدائی سماعت کے بعد تمام فریقین کو نومبر تک نوٹس جاری کرتے ہوئے دلائل طلب کر لیے ہیں، جب کہ کیس کی باضابطہ شنوائی جنوری 2026 میں شروع ہونے کا امکان ہے۔ یاد رہے کہ اس سے قبل متعدد بولی وڈ اداکار بھی اپنی تصاویر اور آواز کے غیر قانونی استعمال پر اے آئی کمپنیوں کے خلاف قانونی چارہ جوئی کر چکے ہیں۔
Discussion about this post