شاہ رخ خان اور دپیکا پڈوکون کیخلاف مقدمہ درج

بھارت کے شہر بھرت پور (راجستھان) میں ایک معروف کار برانڈ کے خلاف مبینہ تکنیکی خرابیوں کے الزام پر مقدمہ درج کیا گیا ہے، جس میں بالی ووڈ سپر اسٹارز شاہ رُخ خان اور دیپیکا پڈوکون کو بھی نامزد کیا گیا ہے۔ مقامی وکیل کیرتی سنگھ نے پولیس کو دی گئی درخواست میں مؤقف اختیار کیا کہ انہوں نے 2022 میں 23.97 لاکھ بھارتی روپے کی ایک نئی کار خریدی تھی، مگر چند ماہ کے اندر ہی اس میں سنگین تکنیکی خرابیاں ظاہر ہو گئیں جو حادثات کا سبب بن سکتی تھیں۔ ڈیلرشپ کی جانب سے تصدیق کی گئی کہ مسئلہ مینوفیکچرنگ فالٹ ہے، جسے درست نہیں کیا جا سکتا۔ ایف آئی آر کے مطابق وکیل نے دعویٰ کیا کہ انہوں نے گاڑی خریدنے کا فیصلہ شاہ رُخ خان اور دیپیکا پڈوکون کے اشتہارات دیکھ کر کیا تھا، جن میں گاڑی کو ’ٹربل فری‘ قرار دیا گیا تھا۔ درخواست گزار کے مطابق اشتہارات حقیقت کے برعکس ثابت ہوئے۔پولیس کا کہنا ہے کہ مقدمہ درج کر کے تفتیش کا آغاز کر دیا گیا ہے اور معاملے کے تمام پہلوؤں کا جائزہ لیا جا رہا ہے۔