وزیراعظم شہباز شریف سے ائیر چیف ظہیر احمد بابر کی ملاقات

وزیراعظم محمد شہباز شریف سے پاک فضائیہ کے سربراہ ایئر چیف مارشل ظہیر احمد بابر سدھو نے اہم ملاقات کی، جس میں ملکی فضائی سرحدوں کے دفاع اور پاک فضائیہ کے پیشہ ورانہ امور پر تفصیلی تبادلۂ خیال کیا گیا۔ وزیراعظم نے مادرِ وطن کی حفاظت میں پاک فضائیہ کے کردار کو زبردست خراجِ تحسین پیش کرتے ہوئے کہا کہ ہمارے شاہین قوم کی فضاؤں پر سیسہ پلائی دیوار بن کر کھڑے ہیں۔ انہوں نے کہا کہ حق و باطل کے معرکے میں پاک فضائیہ کے جانبازوں نے دشمن کے جہاز زمین بوس کرکے نہ صرف اسے کاری ضرب لگائی بلکہ جرات، عزم اور بہادری کی ایک ناقابلِ فراموش تاریخ رقم کی۔ وزیراعظم نے کہا کہ فضاؤں کے یہ نگہبان ہمارے فخر اور پاکستان کے اصل محافظ ہیں، جو ہر محاذ پر اپنی جان ہتھیلی پر رکھ کر وطن کی عزت و وقار کا پرچم بلند رکھتے ہیں۔