آرمی چیف اور چینی وزیرِ خارجہ کی اہم ملاقات، پاک چین تعلقات کو نئی بلندیوں پر لے جانے کے عزم کا اعادہ

پاک فوج کے سپہ سالار فیلڈ مارشل سید عاصم منیر سے برادر ملک چین کے وزیرِ خارجہ وانگ ژی نے ملاقات کی، جس میں چین نے پاکستان کی خودمختاری اور ترقی کے لیے اپنی غیر متزلزل حمایت کا دوٹوک یقین دلایا۔ آئی ایس پی آر کے مطابق ملاقات میں علاقائی سلامتی، دہشت گردی کے خلاف تعاون اور باہمی دلچسپی کے امور پر تفصیلی تبادلۂ خیال کیا گیا۔ دونوں رہنماؤں نے ہر موسم کی اسٹریٹجک شراکت داری کو مزید مضبوط بنانے اور علاقائی و عالمی سطح پر تعاون بڑھانے کے عزم کو ایک بار پھر دہرا دیا۔ چینی وزیرِ خارجہ نے پاکستان کے ساتھ اپنی دوستی کو "استقامت اور پائیداری کی علامت” قرار دیتے ہوئے کہا کہ چین ہمیشہ پاکستان کے شانہ بشانہ کھڑا ہے۔ فیلڈ مارشل عاصم منیر نے چین کے مستقل تعاون پر تہہ دل سے شکریہ ادا کیا۔ ملاقات کا اختتام خطے میں امن، استحکام اور خوشحالی کے فروغ کے مشترکہ عزم کے ساتھ ہوا۔

یاد رہے کہ وانگ ژی نے اپنے دورۂ پاکستان کے دوران وزیراعظم شہباز شریف اور صدر آصف علی زرداری سے بھی الگ الگ ملاقاتیں کیں۔ وزیراعظم نے چین کی مستقل حمایت پر گہری تشکر کا اظہار کرتے ہوئے کہا کہ پاکستان ہمیشہ چین کے بنیادی مسائل پر غیر متزلزل حمایت فراہم کرتا رہے گا۔ انہوں نے چینی صدر شی جن پنگ کی بصیرت افروز قیادت کو خراجِ تحسین بھی پیش کیا۔ صدرِ مملکت آصف علی زرداری نے بھی ملاقات میں اس بات پر زور دیا کہ پاکستان اور چین آہنی بھائی، آزمودہ دوست اور ہر موسم کے اسٹریٹجک شراکت دار ہیں۔ انہوں نے کہا کہ چین کے ساتھ دوستی پاکستان کی خارجہ پالیسی کا بنیادی ستون ہے جسے عوام، قیادت اور اداروں کی سطح پر مکمل حمایت حاصل ہے۔ چینی وزیرِ خارجہ نے اس موقع پر پاک–چین تعلقات کو نئی بلندیوں پر لے جانے کے عزم کا اظہار کیا، یوں یہ دورہ دونوں ممالک کی لازوال رفاقت کو مزید جِلا بخشتا ہے۔