فیلڈ مارشل سید عاصم منیر کی قائدانہ صلاحیتوں کا عالمی اعتراف

ملٹری ڈپلومیسی کی شاندار مثال قائم کرتے ہوئے فیلڈ مارشل سید عاصم منیر کی قائدانہ صلاحیتوں کو دنیا بھر میں سراہا جارہا ہے۔ معروف عالمی جریدے واشنگٹن ٹائمز نے اپنی تازہ رپورٹ میں فیلڈ مارشل کو ’’مردِ آہن‘‘ قرار دیا ہے۔ رپورٹ کے مطابق فیلڈ مارشل سید عاصم منیر جنوبی ایشیا میں صدر ڈونلڈ ٹرمپ کے نئے اسٹریٹجک پارٹنر کے طور پر ابھر رہے ہیں۔ وہ مضبوط اعصاب کے مالک، نظم و ضبط کے پابند اور سخت فیصلے لینے کی بھرپور صلاحیت رکھنے والے پیشہ ور سپاہ سالار ہیں۔ واشنگٹن ٹائمز نے اپنی رپورٹ میں کہا ہے کہ فیلڈ مارشل سیاست یا خودنمائی میں دلچسپی نہیں رکھتے، تاہم پاک بھارت کشیدگی کے دوران ان کی عوامی مقبولیت میں نمایاں اضافہ ہوا۔ یہی خصوصیات انہیں صدر ٹرمپ کے لیے ایک فطری شراکت دار بناتی ہیں۔ عالمی جریدے کے مطابق بھارت سے بگڑتے تعلقات کے تناظر میں فیلڈ مارشل سید عاصم منیر اور صدر ٹرمپ کی ملاقات انتہائی اہمیت کی حامل ہے۔

صدر ٹرمپ کی مداخلت پر پاکستان اور بھارت کے درمیان جنگ بندی عمل میں آئی، پاکستان نے شکریہ ادا کیا جبکہ بھارتی وزیر اعظم نریندر مودی نے ثالثی سے انکار کیا۔ رپورٹ میں مزید کہا گیا کہ فیلڈ مارشل سید عاصم منیر نے افغانستان اور ایران سے لاحق خطرات کے تناظر میں عملی حکمتِ عملی وضع کرنے میں کلیدی کردار ادا کیا۔ وہ دہشت گرد تنظیموں کے خلاف مؤثر کارروائی کے حامی ہیں اور انسدادِ دہشت گردی کے حوالے سے پاک امریکہ تعلقات مزید مضبوط ہوئے ہیں۔ واشنگٹن ٹائمز نے یہ بھی لکھا کہ پاکستان نے کابل ایئرپورٹ حملے کے ماسٹر مائنڈ کو گرفتار کرکے امریکہ کے حوالے کیا، جس پر صدر ٹرمپ نے پاکستان کی قربانیوں اور کوششوں کو سراہا۔ جریدے کے مطابق ٹرمپ انتظامیہ پاکستان کے ساتھ تعلقات کو مزید فروغ دینے کے لیے سرگرم ہے۔