چیف الیکشن کمشنر اور 2 ارکان کیخلاف شکایات خارج

سپریم جوڈیشل کونسل نے چیف الیکشن کمشنر سکندر سلطان راجا اور دو ارکان نثار احمد اور شاہ محمد کے خلاف دائر تین شکایات کو خارج کر دیا ہے۔

اجلاس اور فیصلہ

سپریم کورٹ کی جانب سے جاری اعلامیے کے مطابق سپریم جوڈیشل کونسل کے اجلاس 8 نومبر اور 13 دسمبر 2024 کو منعقد ہوئے تھے۔ ان اجلاسوں میں چیف الیکشن کمشنر سمیت دو اراکین کے خلاف شکایات کا تفصیلی جائزہ لیا گیا اور یہ قرار دیا گیا کہ شکایات میں کوئی ٹھوس بنیاد موجود نہیں، لہٰذا انہیں خارج کیا جاتا ہے۔

اجلاس میں کون شریک ہوا؟

سپریم جوڈیشل کونسل کا اجلاس چیف جسٹس پاکستان یحییٰ آفریدی کی صدارت میں ہوا۔ اجلاس میں سینئر جج منصور علی شاہ، جسٹس منیب اختر، چیف جسٹس اسلام آباد ہائی کورٹ عامر فاروق اور چیف جسٹس بلوچستان ہائی کورٹ محمد ہاشم کاکڑ نے شرکت کی۔

پس منظر اور دیگر شکایات

یاد رہے کہ اس سے قبل 8 نومبر 2024 کو سپریم جوڈیشل کونسل نے ججز کے خلاف دائر 10 شکایات کو ثبوت نہ ہونے کی بنیاد پر نمٹا دیا تھا، جب کہ اسلام آباد ہائی کورٹ کے 6 ججوں کے خط کے تناظر میں عدلیہ کے معاملات میں انتظامیہ کی مبینہ مداخلت پر بھی غور کیا گیا تھا۔

ترامیم اور کمیٹی کی تشکیل

13 دسمبر 2024 کے اجلاس میں کونسل نے ججز کوڈ آف کنڈکٹ اور سپریم جوڈیشل کونسل انکوائری پروسیجر 2005 میں ترامیم کے لیے تبادلہ خیال کیا اور اس مقصد کے لیے جسٹس منیب اختر کی سربراہی میں کمیٹی قائم کی۔ اعلامیے کے مطابق اجلاس کے دوران آرٹیکل 209 کے تحت ججز کے خلاف دائر 35 شکایات کا بھی جائزہ لیا گیا، جن میں سے 30 کو نمٹا دیا گیا جبکہ 5 پر مزید تبصرے طلب کیے گئے۔