ہیروز انٹرنیشنل تائیکوانڈو میں پاکستان کا جھنڈا بلند، 12 گولڈ، 4 سلور میڈلز

پاکستان کی تائیکوانڈو ٹیم نے ملائیشیا میں منعقدہ ساتویں ہیروز انٹرنیشنل تائیکوانڈو چیمپئن شپ 2025ء میں شاندار کارکردگی دکھاتے ہوئے دنیا کو حیران کر دیا۔ قومی کھلاڑیوں نے مجموعی طور پر 12 سونے اور 4 چاندی کے تمغے جیت کر سبز ہلالی پرچم کو سربلند کر دیا۔ ٹیم کے مایہ ناز کھلاڑی میاں غفران علی نے نہ صرف 2 گولڈ اور 2 سلور میڈلز جیتے بلکہ بہترین کوچ کا ایوارڈ بھی اپنے نام کیا۔ لاہور کی طیّبہ اشرف تین طلائی تمغوں کے ساتھ چمکیں، جبکہ سنبل خان نے 2 گولڈ اور 1 سلور میڈل حاصل کر کے ملک کا نام روشن کیا۔ فیصل آباد کے حافظ ناصر بشیر نے 90 کلو فائٹ میں گولڈ جیتا، لاہور کے نبیل خالد نے 2 گولڈ اور 1 سلور اپنے نام کیا، اور شاہروز ارشد نے 80 پلس کلو فائٹ میں سونے کا تمغہ جیتا۔

یہ کامیابی اس لحاظ سے بھی قابلِ فخر ہے کہ پاکستانی ٹیم نے سیلف فنڈنگ پر ایونٹ میں شرکت کی، لیکن محدود وسائل کے باوجود عالمی اسٹیج پر بہترین نتائج دے کر شاندار مثال قائم کی۔ اس چیمپئن شپ میں دنیا بھر کے 35 سے زائد ممالک کے ساڑھے سات سو سے زیادہ کھلاڑیوں نے حصہ لیا، مگر پاکستانی ٹیم نے اپنی محنت، عزم اور مہارت سے سب کی توجہ حاصل کر لی۔