فتنۃ الہندوستان کے مزید 3 دہشت گرد ہلاک، 4 دن میں کل 50 مارے گئے

بلوچستان کے ضلع ژوب کے سرحدی علاقے سمبازا میں سیکیورٹی فورسز نے ایک اور بھرپور کارروائی کرتے ہوئے فتنۃ الہندوستان کے 3 دہشت گردوں کو جہنم واصل کر دیا، جس کے بعد گزشتہ 4 روز میں مارے جانے والے دہشت گردوں کی تعداد 50 ہو گئی ہے۔ پاک فوج کے شعبہ تعلقات عامہ (آئی ایس پی آر) کے مطابق 7 سے 9 اگست کے دوران ژوب کے اسی علاقے میں ایک بڑے آپریشن کے نتیجے میں 47 خوارج ہلاک کیے گئے تھے۔ بعد ازاں 10 اور 11 اگست کی درمیانی شب ایک اور ہدفی کارروائی میں مزید 3 دہشت گرد مارے گئے۔ آپریشن کے دوران دہشت گردوں سے بھاری مقدار میں اسلحہ، بارود اور دھماکا خیز مواد برآمد کیا گیا، جو ملک میں امن و استحکام کو سبوتاژ کرنے کے لیے تیار کیا گیا تھا۔ آئی ایس پی آر نے واضح کیا کہ سیکیورٹی فورسز قومی دفاع اور عوام کے تحفظ کے لیے پوری طرح پرعزم ہیں اور ملک میں ترقی و امن کو نقصان پہنچانے کی ہر کوشش کو ناکام بنائیں گی۔ وفاقی وزیرِ داخلہ محسن نقوی نے دہشت گردوں کے خاتمے پر سیکیورٹی فورسز کو زبردست خراجِ تحسین پیش کرتے ہوئے کہا کہ فورسز نے بلوچستان میں بھارتی اسپانسرڈ دہشت گردوں کی سازشوں کو چکنا چور کر دیا۔ ان کا کہنا تھا کہ دشمن کے ناپاک عزائم کو ناکام بنانا فورسز کی پیشہ ورانہ مہارت اور جرات کا منہ بولتا ثبوت ہے۔ وزیراعلیٰ سندھ مراد علی شاہ نے بھی ژوب آپریشن پر سیکیورٹی فورسز کو سلام پیش کرتے ہوئے کہا کہ قوم کا سر فخر سے بلند کرنے والے جوانوں کی قربانیاں ناقابلِ فراموش ہیں۔ انہوں نے کہا کہ دراندازی کی کوشش کو ناکام بنا کر امن قائم رکھنے پر سیکیورٹی ادارے پوری قوم کے شکر گزار ہیں۔ 7 اگست سے جاری ان آپریشنز میں اب تک 50 خوارج اپنے انجام کو پہنچ چکے ہیں، جو اس بات کا ثبوت ہے کہ پاکستان کے محافظ ہر محاذ پر دشمن کے خلاف سیسہ پلائی دیوار بنے کھڑے ہیں۔