سینئر وکیل خواجہ شمس السلام قتل : سہولت کار کی خیبرپختونخوا سے گرفتاری

کراچی میں یکم اگست کو قتل ہونے والے سینئر وکیل خواجہ شمس السلام کے ہائی پروفائل قتل کیس میں پولیس نے بڑی پیش رفت کرتے ہوئے مرکزی ملزم عمران آفریدی کے سہولت کار کو خیبرپختونخوا سے گرفتار کر لیا۔ پولیس ذرائع کے مطابق گرفتار سہولت کار کی شناخت حسن کے نام سے ہوئی ہے، جو واردات کے بعد عمران آفریدی کو کار میں بٹھا کر خیبرپختونخوا فرار کروا رہا تھا۔ ملزم کے قبضے سے واردات میں استعمال ہونے والی گاڑی بھی برآمد کر لی گئی ہے۔ حکام کا کہنا ہے کہ حسن کو تکنیکی شواہد کی بنیاد پر ٹریس کرکے حراست میں لیا گیا۔ تفتیش کے دوران اس سے مرکزی ملزم کی ممکنہ ٹھکانے اور فرار کے راستوں سے متعلق معلومات لی جا رہی ہیں۔

پولیس کا کہنا ہے کہ مرکزی ملزم عمران آفریدی کی گرفتاری کے لیے مختلف مقامات پر چھاپے مارے جا رہے ہیں، اور امید ہے کہ جلد اسے گرفتار کر لیا جائے گا۔یاد رہے کہ یکم اگست کو ڈیفنس کے علاقے میں سینئر وکیل خواجہ شمس السلام کو ٹارگٹ کر کے قتل کیا گیا تھا، جس کے بعد وکلا برادری اور شہری حلقوں میں شدید غم و غصہ پایا جاتا ہے۔