کپل شرما کے کینیڈا کیفے پر ایک ماہ میں دوسرا حملہ، بشنوئی گینگ کی کھلی دھمکی

بھارت کے معروف کامیڈین اور اداکار کپل شرما کے کیفے "کیپس کیفے” پر ایک ماہ کے دوران دوسرا بڑا مسلح حملہ ہوا ہے، جس کی ذمہ داری بدنامِ زمانہ بشنوئی گینگ نے قبول کرتے ہوئے اگلی کارروائی کی کھلی دھمکی بھی دے دی ہے۔ پولیس کے مطابق یہ واقعہ صبح تقریباً 4 بج کر 40 منٹ پر پیش آیا، جب نامعلوم حملہ آور چلتی گاڑی سے کیفے پر اندھا دھند 25 گولیاں برسا کر فرار ہوگئے۔ خوش قسمتی سے کوئی جانی نقصان نہیں ہوا، تاہم کیفے کی کھڑکیوں اور عمارت کو شدید نقصان پہنچا۔

یہ کیفے کپل شرما اور ان کی اہلیہ کا مشترکہ کاروبار ہے، جو برٹش کولمبیا کے شہر سرے میں واقع ہے اور چند ہفتے قبل ہی افتتاح ہوا تھا۔ اس سے قبل 10 جولائی کو بھی کیفے پر فائرنگ ہو چکی ہے، جب اندر عملہ موجود تھا، جس سے علاقے میں خوف و ہراس پھیل گیا تھا۔ بھارتی میڈیا کے مطابق گینگسٹر گُرپریت سنگھ عرف گولڈی ڈھلون اور لارنس بشنوئی گروپ نے سوشل میڈیا پر بیان جاری کرتے ہوئے حملے کی ذمہ داری قبول کی۔ گولڈی ڈھلون نے کہا،
"ہم نے کپل شرما کو فون کیا مگر جواب نہ ملنے پر یہ کارروائی کی۔ اگر اب بھی فون نہ اٹھایا تو اگلا ایکشن ممبئی میں ہوگا۔”

واضح رہے کہ کیفے کے افتتاح کے چند روز بعد ہونے والے پہلے حملے کی ذمہ داری ہر جیت سنگھ نامی دہشت گرد نے قبول کی تھی، جس نے کپل شرما سے ایک مبینہ متنازع بیان پر معافی کا مطالبہ کیا تھا۔