ایف آئی اے نے ملک کے تمام بڑے بین الاقوامی ایئرپورٹس پر غیر ملکی مسافروں کے لیے الگ امیگریشن کاؤنٹرز قائم کر دیے ہیں۔ یہ قدم وزیراعظم شہباز شریف کی ہدایت پر اٹھایا گیا ہے تاکہ ایئرپورٹس پر امیگریشن کا عمل آسان اور تیز بنایا جا سکے۔ کراچی، لاہور، اسلام آباد، پشاور، ملتان اور سیالکوٹ ایئرپورٹس پر یہ نئے کاؤنٹر کام کرنا شروع ہو چکے ہیں۔ ایف آئی اے کے ترجمان کا کہنا ہے کہ ان کاؤنٹرز سے غیر ملکی سیاحوں، سرمایہ کاروں اور کاروباری افراد کو امیگریشن میں انتظار نہیں کرنا پڑے گا، جس سے پاکستان میں سیاحت اور سرمایہ کاری کو فروغ ملے گا۔ ترجمان نے بتایا کہ وطن واپس آنے والے پاکستانی مسافروں کے لیے بھی امیگریشن کا عمل پہلے سے بہتر اور تیز تر بنایا جا رہا ہے تاکہ سب کو بہتر سروس دی جا سکے۔ یہ فیصلہ 2 اگست کو وزیراعظم کے حکم پر کیا گیا تھا۔ وزیراعظم نے کہا تھا کہ پاکستان آنے والے غیر ملکی مہمانوں کو بہتر سہولت دی جائے تاکہ وہ خوشگوار تجربہ لے کر جائیں۔
Discussion about this post