پاک بحریہ کے سربراہ کو ترکیہ کا اعلیٰ عسکری اعزاز

ترکیہ نے پاک بحریہ کے سربراہ ایڈمرل نوید اشرف کو اُن کی پیشہ ورانہ خدمات، پاک-ترک دفاعی تعلقات کے فروغ، اور علاقائی میری ٹائم سیکیورٹی میں گرانقدر کردار پر اعلیٰ عسکری اعزاز "لیجن آف میرٹ آف دی ترک آرمڈ فورسز” سے نوازا ہے۔ایڈمرل نوید اشرف کو یہ اعزاز ترک نیول فورسز کے ہیڈکوارٹرز میں ایک پُروقار تقریب کے دوران پیش کیا گیا، جہاں اُنہیں گارڈ آف آنر بھی پیش کیا گیا۔ اس موقع پر ترک نیول فورسز کے کمانڈر سے اُن کی اہم ملاقات ہوئی، جس میں دو طرفہ بحری تعاون، مشترکہ مشقوں اور دفاعی شراکت داری پر تفصیلی تبادلہ خیال کیا گیا۔ ترکیہ کے سرکاری دورے کے دوران نیول چیف نے ترک وزیر دفاع، چیف آف جنرل اسٹاف اور کمانڈر ترکش نیوی فلیٹ سے بھی اہم ملاقاتیں کیں۔ ان نشستوں میں علاقائی سلامتی، مشترکہ آپریشنز، تربیتی تعاون اور تکنیکی شراکت داری کو مزید فروغ دینے پر زور دیا گیا۔

ایڈمرل نوید اشرف نے استنبول میں واقع ترک نیول شپ یارڈ کا دورہ کرتے ہوئے ملجم پراجیکٹ کا جائزہ لیا، جو دونوں ممالک کے مابین دفاعی تعاون کی ایک روشن مثال ہے۔ اس کے ساتھ ساتھ انہوں نے گولچک نیول بیس کا دورہ بھی کیا جہاں انہوں نے ترک نیوی کی آبدوز سازی کی صلاحیتوں کا مشاہدہ کیا۔ دورے کے دوران نیول چیف نے ترک نیوی کی مختلف تنصیبات، جہازوں اور بحری تربیتی اداروں کا دورہ کیا۔ وہ ترکیہ کے بانی رہنما مصطفیٰ کمال اتاترک کے مزار پر بھی گئے اور پھولوں کی چادر چڑھائی، جہاں انہوں نے اپنے تاثرات بھی قلمبند کیے۔ ایڈمرل نوید اشرف کا یہ دورہ دونوں برادر اسلامی ممالک کے مابین بحری تعاون، اعتماد اور اسٹریٹجک ہم آہنگی کو نئی بلندیوں تک لے جانے کا سبب بنے گا، جو خطے میں امن و استحکام کے لیے نہایت اہم ہے۔