آج اس بھارتی جارحیت کو چھ سال مکمل ہو چکے ہیں جس نے مقبوضہ کشمیر کی شناخت، حیثیت اور عوامی امنگوں کو روندنے کی کوشش کی۔ اسی دن کی یاد میں آج پاکستان بھر میں یومِ استحصالِ کشمیر عقیدت، مزاحمت اور یکجہتی کے جذبات کے ساتھ منایا جا رہا ہے۔
صدرِ مملکت کا پیغام: کشمیری تنہا نہیں
صدرِ مملکت آصف علی زرداری نے اپنے پیغام میں بھارتی اقدامات کو "غیرقانونی، یکطرفہ اور کشمیریوں کے حقِ خودارادیت پر کھلا حملہ” قرار دیا۔ انہوں نے واضح کیا کہ بھارت کی جانب سے جموں و کشمیر کی خصوصی حیثیت ختم کرنا، غیر کشمیریوں کو ڈومیسائل دینا اور انتخابی حلقہ بندیاں بدلنا ایک گہری سازش ہے ایک ایسی سازش جو کشمیریوں کو ان کے اپنے وطن میں اقلیت میں بدلنے کی ناپاک کوشش ہے۔
"ہم کشمیریوں کی جدوجہد میں ان کے ساتھ کھڑے ہیں — کل بھی، آج بھی، ہمیشہ۔” – صدرِ مملکت
وزیراعظم کا پیغام: حریت رہنماؤں کی قید، حوصلے کی شکست نہیں
وزیراعظم شہباز شریف نے کہا کہ پاکستان ہر فورم پر کشمیریوں کی سیاسی، سفارتی اور اخلاقی حمایت جاری رکھے گا۔ انہوں نے 5 اگست 2019 کے بھارتی اقدامات کو اقوامِ متحدہ کی قراردادوں اور بین الاقوامی قوانین کی صریح خلاف ورزی قرار دیتے ہوئے کہا:
"یاسین ملک، شبیر شاہ اور مسرت عالم جیسے رہنما قید میں ضرور ہیں، مگر ان کا نظریہ، ان کا جذبہ، اور ان کی جدوجہد زندہ ہے۔”
آزاد کشمیر کے وزیراعظم کا عزم
وزیراعظم آزاد کشمیر چوہدری انوارالحق نے کشمیری عوام کی جدوجہد کو خراج تحسین پیش کرتے ہوئے عالمی برادری سے مطالبہ کیا کہ وہ بھارت کی ریاستی بربریت پر خاموش تماشائی نہ بنے۔
مسلح افواج کا اعلانِ یکجہتی: کشمیریوں کے شانہ بشانہ
آئی ایس پی آر کی جانب سے جاری اعلامیہ میں آرمی چیف جنرل سید عاصم منیر، چیئرمین جوائنٹ چیفس، نیول چیف اور ایئر چیف کی جانب سے کشمیری عوام کے ساتھ غیر متزلزل یکجہتی کا اعادہ کیا گیا۔
مسلح افواج نے واضح کیا:
"ہم کشمیری عوام کی اُس جائز، پرامن اور تاریخی جدوجہد کے ساتھ کھڑے ہیں، جو اقوامِ متحدہ کی قراردادوں کے مطابق ان کا ناقابلِ تنسیخ حق ہے۔”
اعلامیے میں بھارت کی مسلسل جارحیت، میڈیا پر پابندیاں، انسانی حقوق کی خلاف ورزیاں اور آبادیاتی تناسب میں غیر قانونی تبدیلیوں کو "خطے کے امن کے لیے خطرہ” قرار دیا گیا۔
کشمیری عوام کو سلام
یومِ استحصال کشمیر کے موقع پر پاکستان کی مسلح افواج نے شہدائے کشمیر کو خراجِ عقیدت پیش کیا اور عہد کیا کہ وہ کشمیریوں کی آزادی کی جدوجہد میں ہر قدم پر ان کے ساتھ کھڑے رہیں گے۔
Discussion about this post