ویسٹ انڈیز کے خلاف پاکستان کی کامیابی

پاکستان نے ویسٹ انڈیز کے خلاف تین ٹی ٹوئنٹی میچز پر مشتمل سیریز کے پہلے معرکے میں 14 رنز سے یادگار فتح حاصل کرلی۔ شاندار بیٹنگ اور نپی تلی بولنگ نے ویسٹ انڈین سورماؤں کو بے بس کر دیا۔لاؤڈرہل، فلوریڈا میں کھیلے گئے میچ میں قومی ٹیم نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 178 رنز کا ہدف سیٹ کیا۔ نوجوان اوپنر صائم ایوب نے شاندار بلے بازی کا مظاہرہ کرتے ہوئے 57 رنز کی دلکش اننگز کھیلی، جس میں کئی خوبصورت اسٹروکس شامل تھے۔ ان کے علاوہ فخر زمان نے 28 اور حسن نواز نے 24 قیمتی رنز کا اضافہ کیا۔

ویسٹ انڈیز کی جانب سے شمار جوزف نے متاثر کن بولنگ کرتے ہوئے 3 وکٹیں حاصل کیں۔ جواب میں ویسٹ انڈیز کی ٹیم ہدف کے تعاقب میں مقررہ اوورز میں 7 وکٹوں کے نقصان پر 164 رنز ہی بنا سکی۔ اننگز میں جانسن چارلس اور جیول اینڈریو نے 35، 35 رنز بنائے، جبکہ جیسن ہولڈر 30 رنز کے ساتھ ناٹ آؤٹ رہے، مگر پاکستانی بولرز نے انہیں کھل کر کھیلنے کا موقع نہ دیا۔ بولنگ کے شعبے میں محمد نواز نے تجربے کا بھرپور فائدہ اٹھاتے ہوئے 3 کھلاڑیوں کو پویلین بھیجا، جب کہ صائم ایوب نے اپنی آل راؤنڈ صلاحیتوں کا بھرپور اظہار کرتے ہوئے 2 قیمتی وکٹیں بھی حاصل کیں۔ شاہین آفریدی اور سفیان مقیم کے حصے میں ایک ایک وکٹ آئی۔ صائم ایوب کو شاندار آل راؤنڈ پرفارمنس پر پلیئر آف دی میچ قرار دیا گیا۔ انہوں نے بعد از میچ گفتگو میں کہا کہ:

"ٹیم کی جانب سے جو ذمہ داری ملے، اسے ایمان داری اور جذبے سے نبھانے کی کوشش کرتا ہوں۔”

اس فتح کے ساتھ پاکستان نے نہ صرف سیریز میں برتری حاصل کی بلکہ نوجوان کھلاڑیوں کے اعتماد میں بھی نمایاں اضافہ ہوا۔ اس میچ کے لیے پاکستان کی ٹیم ان کھلاڑیوں پر مشتمل تھی: صاحبزادہ فرحان، صائم ایوب، فخر زمان، محمد حارث (وکٹ کیپر)، سلمان علی آغا (کپتان)، حسن نواز، محمد نواز، فہیم اشرف، شاہین آفریدی، حارث رؤف اور سفیان مقیم۔ واضح رہے کہ پاکستان اور ویسٹ انڈیز کے درمیان اب تک 21 ٹی ٹوئنٹی میچز کھیلے جا چکے ہیں، جن میں پاکستان نے 15 فتوحات سمیٹی ہیں، جبکہ ویسٹ انڈیز کو صرف 3 میچز میں کامیابی حاصل ہوئی، اور 3 میچز بے نتیجہ رہے۔ ادھر پاکستان کرکٹ ٹیم کے ون ڈے اسکواڈ میں شامل کھلاڑی  بابر اعظم، محمد رضوان، نسیم شاہ اور عبداللہ شفیق  امریکا روانہ ہوچکے ہیں، جہاں وہ اسکواڈ کو جوائن کریں گے۔ ٹی ٹوئنٹی سیریز کے اختتام کے بعد پاکستانی ٹیم ویسٹ انڈیز روانہ ہوگی، جہاں ٹرینیڈاڈ کے خوبصورت میدانوں میں 3 ایک روزہ میچز کی سیریز کھیلی جائے گی۔ یہ ون ڈے سیریز 8 اگست سے آغاز کرے گی، اور شائقینِ کرکٹ ایک بار پھر سنسنی خیز مقابلوں کے لیے پرجوش ہیں۔