ورلڈ چیمپئن شپ آف لیجنڈز 2025 : بھارت کا سیمی فائنل میں بھی پاکستان سے کھیلنے سے انکار

ورلڈ چیمپئن شپ آف لیجنڈز (WCL) 2025 نے ایک نیا تنازع جنم دے دیا ہے، جب بھارتی لیجنڈز ٹیم نے سیمی فائنل میں بھی پاکستان کے خلاف میدان میں اترنے سے انکار کر دیا۔ اس فیصلے کے بعد 31 جولائی کو شیڈول کیا گیا پہلا سیمی فائنل منسوخ کر دیا گیا ہے، اور پاکستان کو فائنل میں براہ راست رسائی دے دی گئی ہے۔ڈبلیو سی ایل انتظامیہ نے سماجی رابطے کی ویب سائٹ ایکس (سابقہ ٹوئٹر) پر جاری ایک بیان میں بھارت کے سیمی فائنل سے دستبرداری کی تصدیق کی، جس پر کرکٹ شائقین میں شدید مایوسی کی لہر دوڑ گئی ہے۔

Semi – Finals Update ! pic.twitter.com/lTmh3j0sSP

— World Championship Of Legends (@WclLeague) July 30, 2025

پاکستان براہِ راست فائنل میں

پاکستان اب 2 اگست کو فائنل میں جنوبی افریقہ یا آسٹریلیا کے خلاف میدان میں اترے گا۔ اس سنسنی خیز مقابلے کا منتظر کرکٹ دیوانہ دنیا بھر میں نظریں جمائے بیٹھا ہے، لیکن بھارت کی مسلسل عدم شرکت نے ٹورنامنٹ کی شفافیت اور کھیل کی روح پر سوالات اٹھا دیے ہیں۔

پہلے مرحلے میں بھی کھیلنے سے انکار

یہ پہلا موقع نہیں کہ بھارت نے پاکستان کے خلاف کھیلنے سے گریز کیا ہو۔ اس سے قبل گروپ مرحلے میں بھی بھارت نے شاہد آفریدی کی قیادت میں کھیلنے والی پاکستانی ٹیم کے خلاف میدان میں اترنے سے انکار کر دیا تھا، جس کے نتیجے میں وہ میچ بھی منسوخ کر دیا گیا تھا۔ ذرائع کے مطابق بھارتی ٹیم کے معروف کھلاڑیوں شیکھر دھون، یوسف پٹھان، عرفان پٹھان اور ہربھجن سنگھ نے شاہد آفریدی کی ٹیم میں موجودگی کو جواز بنا کر پاکستان کے خلاف کھیلنے سے انکار کیا۔

منتظمین کا ردِعمل

ٹورنامنٹ کے منتظمین نے اپنے بیان میں پاکستان-بھارت میچ کی منسوخی پر افسوس کا اظہار کرتے ہوئے کہا کہ "یہ کھیل قوموں کے درمیان تعلقات کو جوڑنے کا ذریعہ ہوتا ہے، نہ کہ دوری پیدا کرنے کا۔” تاہم، سیمی فائنل میں بھی بھارت کے اس مؤقف پر قائم رہنے سے ٹورنامنٹ کی اسپورٹس مین شپ کو شدید دھچکا پہنچا ہے۔