پاک فوج کے سپہ سالار فیلڈ مارشل سید عاصم منیر نے ایک بار پھر دشمن کو واضح پیغام دیا ہے کہ پاکستان کے خلاف ہائبرڈ جنگ کے تمام حربے ناکام ہوں گے، اور بھارت کو معرکۂ حق میں عبرتناک شکست کا سامنا پہلے بھی ہوا ہے اور آئندہ بھی ہوگا۔ آئی ایس پی آر کے مطابق، نیشنل ورکشاپ بلوچستان کے 16ویں سیشن کے شرکاء سے گفتگو کرتے ہوئے فیلڈ مارشل نے کہا کہ بھارت دہشت گرد گروہوں کی پشت پناہی کے ذریعے بلوچستان کے امن، ترقی اور وفادار عوام کو نشانہ بنانے کی کوشش کر رہا ہے، لیکن یہ سازشیں قوم کی یکجہتی اور افواج پاکستان کے عزم کے سامنے دم توڑ جائیں گی۔ انہوں نے دشمن کے مکروہ عزائم کی مذمت کرتے ہوئے کہا کہ دہشت گردی ایک ایسی لعنت ہے جو مذہب، فرقے یا نسل کی تمیز نہیں رکھتی۔ اس کے خاتمے کے لیے پوری قوم کو یکجہتی، عزم اور بیداری کے ساتھ میدان میں آنا ہوگا۔ انہوں نے کہا کہ ہم ہر اندرونی و بیرونی خطرے کا ڈٹ کر مقابلہ کریں گے اور قومی وقار، سالمیت اور عوام کی سلامتی کا ہر قیمت پر تحفظ کیا جائے گا۔
فیلڈ مارشل عاصم منیر نے بلوچستان میں جاری ترقیاتی منصوبوں پر بھی روشنی ڈالی اور کہا کہ پاکستان کی خوشحالی بلوچستان کی ترقی سے جڑی ہے۔ انہوں نے قومی اداروں کے درمیان قریبی تعاون اور ایک جامع حکمت عملی کو وقت کی اہم ترین ضرورت قرار دیا۔ اجلاس کے اختتام پر شرکاء اور فیلڈ مارشل کے درمیان بامقصد اور خوشگوار مکالمہ بھی ہوا، جس میں بلوچستان کے عوام کی فلاح، قومی یکجہتی اور امن و استحکام کے موضوعات پر سیر حاصل گفتگو کی گئی۔
Discussion about this post