پاکستان شوبز انڈسٹری کے معروف میزبان و اداکار ساحر لودھی ایک بار پھر سوشل میڈیا پر خبروں کی زینت بن گئے ہیں، مگر اس بار وجہ ان کا کوئی شو یا فلم نہیں بلکہ ان کے سوشل میڈیا پر وائرل ہونے والی ویڈیوز ہیں۔ ان دنوں ساحر لودھی کے آفیشل اکاؤنٹس پر اُن کی روزمرہ مصروفیات کی ویڈیوز باقاعدگی سے پوسٹ کی جا رہی ہیں، جن میں وہ اکثر کسی میٹنگ کی تیاری میں مصروف دکھائی دیتے ہیں۔ ان ویڈیوز میں اکثر ایسا تاثر دیا جاتا ہے جیسے ویڈیو اچانک بنائی گئی ہو اور ساحر لودھی اس سے لاعلم ہوں۔ تاہم، صارفین نے ان کلپس کو مصنوعی، جذباتی اور حد سے زیادہ اداکاری سے بھرپور قرار دیتے ہوئے سوشل میڈیا پر میمز کی بھرمار کر دی ہے۔ اس کے بعد نامور اداکار یاسر نواز، فیصل قریشی اور اعجاز اسلم نے بھی ان ویڈیوز پر مزاحیہ انداز میں ردعمل دیتے ہوئے دلچسپ پیروڈیز بنائیں، جنہیں عوام نے خوب سراہا۔ لیکن اس سارے معاملے میں نیا موڑ اس وقت آیا، جب اداکارہ مہوش حیات میدان میں آئیں۔ انہوں نے اپنے سوشل میڈیا پیغام میں واضح طور پر کہا کہ:
"ساحر لودھی انڈسٹری کے ایک محنتی اور مستقل مزاج فنکار ہیں۔ اُن کا مذاق اُڑانا نہ صرف غیر اخلاقی ہے بلکہ یہ اُن کی برسوں کی محنت کی توہین ہے۔”
مہوش حیات نے مزید کہا کہ ہمیں ایک دوسرے کے جذبات کا احترام کرنا چاہیے اور شوبز جیسے مشکل میدان میں کام کرنے والوں کی حوصلہ افزائی کرنی چاہیے۔ ان کا بیان سامنے آنے کے بعد سوشل میڈیا پر رائے تقسیم ہو گئی ہے۔ کچھ صارفین مہوش حیات کے مؤقف کی تائید کر رہے ہیں جبکہ دیگر کا کہنا ہے کہ عوامی شخصیات کو تنقید کا سامنا کرنا ہی پڑتا ہے۔ فی الحال، ساحر لودھی نے اس تنازعے پر کوئی باضابطہ ردعمل نہیں دیا۔
Discussion about this post