2006 ممبئی ٹرین بم دھماکے , ہائی کورٹ نے 12 میں سے 11 ملزمان کو بری کر دیا

ممبئی ہائی کورٹ نے 2006 کے ہولناک ٹرین بم دھماکوں کے مقدمے کا فیصلہ سناتے ہوئے 12 میں سے 11 ملزمان کو بری کر دیا ہے۔ بھارتی میڈیا کے مطابق عدالت نے قرار دیا کہ پراسیکیوشن ملزمان کے خلاف الزامات ثابت کرنے میں ناکام رہا۔ عدالتی فیصلے کے بعد 11 ملزمان کو جلد جیل سے رہا کیے جانے کا امکان ہے۔ مقدمے کے دوران 12 واں ملزم وفات پا چکا ہے۔ یاد رہے کہ 11 جولائی 2006 کو ممبئی کی ویسٹرن ریلوے لائن پر چلنے والی 7 مختلف لوکل ٹرینوں میں بم دھماکے ہوئے تھے، جن میں 189 افراد ہلاک اور 827 زخمی ہو گئے تھے۔

ان دھماکوں نے پورے بھارت کو ہلا کر رکھ دیا تھا، اور اسے اُس وقت کا سب سے بڑا دہشت گرد حملہ قرار دیا گیا تھا۔ بعد ازاں ٹرائل کورٹ نے 2015 میں 12 افراد کو سزا سنائی تھی، جن میں 5 کو سزائے موت جبکہ دیگر کو عمر قید و دیگر سزائیں دی گئی تھیں۔ تاہم، ہائی کورٹ نے اب ان سزاؤں کو کالعدم قرار دیتے ہوئے ملزمان کو بری کر دیا۔ ۔