شاہ رخ خان فلمی شوٹنگ کے دوران زخمی، علاج کے لیے امریکا روانہ

بولی وڈ کے کنگ اور کروڑوں دلوں کی دھڑکن شاہ رخ خان نئی ایکشن فلم ’کنگ‘ کی شوٹنگ کے دوران زخمی ہو گئے۔ شوبز ویب سائٹ ’بولی وڈ ہنگامہ‘ کے مطابق شاہ رخ خان کو فلم کی ایکشن سین کے دوران کمر اور مسلز میں چوٹیں آئیں، جس کے بعد انہیں فوری طور پر قریبی اسپتال منتقل کیا گیا، جہاں ان کی ہلکی نوعیت کی سرجری بھی کی گئی۔ ذرائع کے مطابق، اداکار کی طبیعت اب خطرے سے باہر ہے، مگر ڈاکٹروں نے انہیں ایک ماہ سے زائد مکمل آرام کا مشورہ دیا ہے۔ صحت کے مزید جائزے اور مکمل بحالی کے لیے وہ امریکا روانہ ہو چکے ہیں۔

 فلم ’کنگ‘ پر اثر؟

شاہ رخ خان کی اس حادثے کے باعث فلم ’کنگ‘ کی شوٹنگ عارضی طور پر معطل کر دی گئی ہے۔ پروڈکشن ٹیم کا کہنا ہے کہ کنگ خان کی مکمل صحتیابی کے بعد شوٹنگ دوبارہ شروع کی جائے گی۔

 قریبی ذرائع کا کہنا ہے:

"چوٹیں سنگین نہیں تھیں، مگر احتیاطاً شاہ رخ خان نے مکمل علاج کے لیے امریکا جانے کا فیصلہ کیا۔”

مداحوں نے سوشل میڈیا پر اپنے محبوب اداکار کی جلد صحتیابی کے لیے نیک تمناؤں اور دعاؤں کا اظہار کیا ہے۔