پاکستانی شوبز انڈسٹری کے معروف اداکار و میزبان عمران اشرف نے اپنی آنے والی انڈین پنجابی فلم "اینا نوں رہنا سہنا نئی آوندا” کا پہلا پوسٹر جاری کر دیا ہے، جس کے ساتھ انہوں نے مداحوں کو آگاہ کیا ہے کہ فلم اگست میں دنیا بھر میں ریلیز کی جا رہی ہے۔ عمران اشرف نے یہ اعلان انسٹاگرام پر فلم کا پوسٹر شیئر کرتے ہوئے کیا، جس میں انہیں مرکزی کردار میں دیکھا جا سکتا ہے۔ انہوں نے کیپشن میں لکھا کہ “ہم سب نے اس فلم پر بہت محنت کی ہے”۔ یہ فلم ایک کینیڈین پنجابی کامیڈی ہے، جس کی کہانی بین الاقوامی طلبہ کو درپیش مسائل کے گرد گھومتی ہے۔ فلم کو بھارتی نژاد کینیڈین ہدایتکار رپن بال نے ڈائریکٹ کیا ہے جبکہ اس کی کہانی سریندر اروڑا نے تحریر کی ہے۔ فلم کی کاسٹ میں عمران اشرف کے ساتھ پاکستانی اداکار ناصر چنیوٹی اور بھارتی فنکار جسی گل، رنجیت باوا، نرمل رشی اور نوپریت کور بنگا شامل ہیں۔ فلم کی شوٹنگ گزشتہ سال مکمل کی گئی تھی۔
View this post on Instagram
عمران اشرف ہانیہ عامر کے بعد دوسرے پاکستانی اداکار ہیں جنہوں نے بھارتی فنکاروں کے ساتھ کام کیا ہے۔ ہانیہ عامر کی فلم سردار جی 3 تاحال بھارت میں ریلیز نہیں ہو سکی، تاہم پاکستان میں اسے بھرپور پذیرائی مل رہی ہے۔ واضح رہے کہ بھارتی ڈائریکٹر کی جانب سے اس فلم کی ریلیز کا فیصلہ ایسے وقت میں سامنے آیا ہے جب دونوں ممالک کے درمیان فنکارانہ تعاون پر دباؤ پایا جاتا ہے۔ مبصرین کے مطابق یہ فلم پاک-بھارت ثقافتی تعلقات میں بہتری کی ایک نئی امید بھی بن سکتی ہے۔
Discussion about this post