لاہور سے کراچی جانے والا مسافر غلطی سے جدہ پہنچا دیا گیا، جس پر شہری نے نجی ایئرلائن اور متعلقہ اداروں کے خلاف سندھ ہائیکورٹ میں درخواست دائر کر دی ہے۔درخواست گزار ملک شاہ زین احمد کا کہنا ہے کہ انہوں نے 7 جولائی کو لاہور سے کراچی کے لیے ایئرسیال کی پرواز کا ٹکٹ خریدا، لیکن ایئرلائن کی سنگین غفلت کے باعث انہیں بغیر پاسپورٹ اور ویزہ کے جدہ جانے والی بین الاقوامی پرواز پر سوار کرا دیا گیا۔ جدہ ایئرپورٹ پر امیگریشن حکام نے انہیں حراست میں لیا، تفتیش کی اور بعد میں لاہور ڈی پورٹ کر دیا۔ واپسی پر انہیں کراچی جانے کے لیے نیا ٹکٹ لینا پڑا۔ شاہ زین نے عدالت سے واقعے کی مکمل تحقیقات، ذمہ داروں کے خلاف کارروائی اور ہرجانے کا مطالبہ کیا ہے۔ انہوں نے ایئرسیال، سول ایوی ایشن، ایف آئی اے اور دیگر اداروں کو فریق بنایا ہے۔ ان کے وکیل کے مطابق اس واقعے سے مسافر کو ذہنی اذیت، مالی نقصان اور عزتِ نفس کو ٹھیس پہنچی، اور یہ مسافر کے بنیادی حقوق کی خلاف ورزی ہے۔
Discussion about this post