اداکارہ حمیرا اصغر کی تدفین، سندھ حکومت وارث بن گئی

فن اور فنکاروں سے محبت کا عملی مظاہرہ، صوبائی وزیر ثقافت و سیاحت سید ذوالفقار علی شاہ نے اداکارہ حمیرا اصغر کی تدفین کا بیڑا اٹھا لیا۔ اس دل سوز اور افسوسناک واقعے پر حکومت سندھ نے نہ صرف گہرے دکھ کا اظہار کیا بلکہ عملی اقدام بھی کر ڈالا۔  صوبائی وزیر نے ایڈیشنل آئی جی کراچی سے فوری رابطہ کرکے تدفین کے حوالے سے تفصیلی گفتگو کی۔ سید ذوالفقار علی شاہ نے ڈائریکٹر جنرل کلچر کو فوکل پرسن مقرر کرتے ہوئے واضح ہدایات جاری کیں کہ اگر مرحومہ کے اہل خانہ لاش وصول نہ کریں، تو سندھ حکومت، محکمہ ثقافت اداکارہ کا "سرکاری وارث” ہوگا۔

سیکریٹری ثقافت کی جانب سے ڈی آئی جی ایسٹ کو باقاعدہ خط ارسال کیا گیا، جس میں صاف الفاظ میں تحریر کیا گیا کہ ”مرحومہ حمیرا اصغر لاوارث نہیں، سندھ حکومت ان کی وارث ہے“۔ خط میں یہ بھی واضح کیا گیا کہ تدفین سے لے کر قبرستان میں سپرد خاک کیے جانے تک تمام مراحل محکمہ ثقافت کی ذمے داری ہوں گے۔ سید ذوالفقار علی شاہ نے اپنے بیان میں کہا:
"یہ ایک افسوسناک، دل دہلا دینے والا واقعہ ہے۔ ہماری اولین ترجیح یہ ہے کہ والدین آگے آئیں، ہم ان سے مکمل تعاون کریں گے۔ لیکن اگر وہ راضی نہ ہوئے، تو حمیرا اصغر کی آخری رسومات ریاستی ذمہ داری بن جائیں گی۔”

انہوں نے یقین دہانی کرائی کہ محکمہ ثقافت، پولیس کے تعاون سے اس دکھ بھرے لمحے میں فنکار برادری کے شانہ بشانہ کھڑا ہوگا۔