98 ویں اکیڈمی ایوارڈز کے لیے پاکستانی فلم سازوں سے درخواستیں طلب

پاکستانی اکیڈمی سلیکشن کمیٹی نے 98ویں اکیڈمی ایوارڈز (آسکرز) میں بین الاقوامی فیچر فلم ایوارڈ کی کیٹیگری کے لیے پاکستانی فلم سازوں سے فلمیں جمع کرانے کی درخواست کی ہے۔ فلم سازوں کو ہدایت کی گئی ہے کہ وہ اپنی فلمیں 15 اگست 2025 تک جمع کرائیں۔ یہ ایوارڈ کیٹیگری ان غیر امریکی فلموں کے لیے مخصوص ہے جن کے مکالمات کا کم از کم 50 فیصد حصہ غیر انگریزی زبان میں ہو۔ اس زمرے میں اینیمیٹڈ اور دستاویزی فلمیں بھی شامل کی جا سکتی ہیں، بشرطیکہ وہ اکیڈمی آف موشن پکچر آرٹس اینڈ سائنسز (AMPAS) کے مقررہ معیار پر پورا اُتریں۔

سلیکشن کمیٹی کے مطابق، صرف وہی فلمیں اہل قرار دی جائیں گی جو 1 اکتوبر 2024 سے 30 ستمبر 2025 کے درمیان کسی کمرشل سینما میں مسلسل سات روز تک عوامی نمائش کے لیے پیش کی گئی ہوں۔ تاہم، فلم کی نمائش امریکہ یا اس کے زیر انتظام علاقوں میں نہیں ہونی چاہیے۔ کمیٹی نے واضح کیا ہے کہ وہ فلمیں جنہیں سینما ریلیز سے قبل کسی بھی غیر تھیٹریکل پلیٹ فارم پر پیش کیا گیا ہو، جیسے کہ ٹی وی، اسٹریمنگ سروسز، آن لائن پلیٹ فارمز یا ایئرلائن انٹرٹینمنٹ، وہ نااہل سمجھی جائیں گی۔ سلیکشن کمیٹی کا کہنا ہے کہ تمام اراکین انفرادی طور پر تمام فلمیں دیکھتے ہیں اور ووٹ دینے کا عمل اکیڈمی کے طے شدہ ضوابط کے تحت مکمل کیا جاتا ہے۔ منتخب فلم کو بعد ازاں پاکستان کی سرکاری نامزدگی کے طور پر اکیڈمی کو جمع کرایا جاتا ہے۔ گزشتہ برسوں میں پاکستان کی جانب سے "جوائے لینڈ”، "ان فلیمز” اور "دی گلاس ورکر” جیسی فلمیں آسکر کے لیے نامزد کی جا چکی ہیں۔ فلم سازوں کو ہدایت کی گئی ہے کہ وہ فلم کے لیے انگریزی سب ٹائٹلز کی فراہمی یقینی بنائیں اور تمام تکنیکی و قانونی تقاضے پورے کریں۔ تفصیلی قواعد و ضوابط کے لیے اکیڈمی ایوارڈز کی ویب سائٹ ملاحظہ کی جا سکتی ہے۔

مزید معلومات یا سوالات کے لیے کمیٹی نے رابطہ ای میل جاری کی ہے: oscarsubmissions.pk@gmail.com