گورنر سندھ کا لیاری سانحہ متاثرین کے لیے 80 گز کے پلاٹ دینے کا اعلان

گورنر سندھ کامران ٹیسوری نے لیاری سانحے کے متاثرین کے لیے 80 گز کے پلاٹ دینے کا اعلان کر دیا۔ انہوں نے کہا کہ متاثرہ خاندانوں کو راشن، روزگار اور چھت فراہم کرنے کے لیے گورنر ہاؤس متحرک کردار ادا کرے گا۔ کراچی میں میڈیا سے گفتگو کرتے ہوئے کامران ٹیسوری کا کہنا تھا کہ وہ کراچی پہنچتے ہی وقت ضائع کیے بغیر لیاری آئے تاکہ سانحے کے متاثرین سے اظہار یکجہتی کیا جا سکے۔ ان کا کہنا تھا:

"لیاری میں عمارت گرنے کا واقعہ معمولی سانحہ نہیں، اس پر خاموشی نہیں برتی جائے گی، ذمہ داروں کو کیفرِ کردار تک پہنچایا جائے گا۔”

سندھ حکومت کو تجاویز بھیجنے کا عندیہ

گورنر سندھ نے بتایا کہ وہ اس واقعے سے متعلق اپنی تمام تجاویز تحریری طور پر سندھ حکومت کو بھیجیں گے تاکہ مستقبل میں ایسے واقعات کی روک تھام کی جا سکے۔ انہوں نے نبیل گبول اور سعید غنی کے بیانات کو بھی مثبت اور تعمیری قرار دیا۔ کامران ٹیسوری نے کہا کہ گورنر ہاؤس متاثرین کے لیے راشن، روزگار اور رہائش کی سہولیات فراہم کرے گا۔ انہوں نے مزید تجویز دی کہ جن عمارتوں کو خطرناک قرار دے کر خالی کرایا جا رہا ہے، حکومت سندھ ان متاثرہ افراد کو چھ ماہ کا کرایہ ادا کرے تاکہ وہ قریبی علاقے میں نئی رہائش اختیار کر سکیں۔

ہندو کمیونٹی سے اظہارِ یکجہتی اور ہیلپ لائن قائم

گورنر سندھ نے ہندو کمیونٹی کے ساتھ مکمل یکجہتی کا اظہار کرتے ہوئے کہا کہ وہ ہر متاثرہ شہری کے ساتھ کھڑے ہیں۔ انہوں نے اعلان کیا کہ گورنر ہاؤس میں ایک خصوصی ہیلپ لائن 1133 قائم کر دی گئی ہے جہاں متاثرہ افراد رابطہ کر کے مدد حاصل کر سکتے ہیں۔ کامران ٹیسوری کا کہنا تھا کہ لیاری میں ان کے حق میں کئی سو لوگ جمع ہوئے اور ان کے لیے نعرے لگائے، جو اس بات کی علامت ہے کہ عوام ان کے اقدامات کو سراہ رہے ہیں۔