پاکستان کا دورہ بنگلہ دیش: پندرہ رکنی قومی اسکواڈ کا اعلان

پاکستان کرکٹ بورڈ نے دورہ بنگلہ دیش کے لیے پندرہ رکنی قومی ٹی ٹوئنٹی اسکواڈ کا اعلان کر دیا ہے۔ سلمان علی آغا کو سیریز کے لیے کپتان برقرار رکھا گیا ہے، جبکہ کسی نائب کپتان کا تقرر نہیں کیا گیا۔پاکستان اور بنگلہ دیش کے درمیان تین ٹی ٹوئنٹی میچز پر مشتمل سیریز 20 جولائی سے 24 جولائی تک ڈھاکا میں کھیلی جائے گی۔ قومی ٹیم 16 جولائی کو بنگلہ دیش روانہ ہوگی، جبکہ اس سے قبل نیشنل بینک اسٹیڈیم کراچی میں تربیتی کیمپ 10 جولائی سے شروع ہو کر 15 جولائی تک جاری رہے گا۔ اسکواڈ میں تجربہ کار کھلاڑیوں کے ساتھ ساتھ نوجوان باصلاحیت کھلاڑیوں کو بھی موقع دیا گیا ہے۔ محمد حارث اور صاحبزادہ فرحان کو وکٹ کیپرز کے طور پر ٹیم کا حصہ بنایا گیا ہے۔

قومی اسکواڈ میں شامل کھلاڑیوں کے نام درج ذیل ہیں:
سلمان علی آغا (کپتان)، ابرار احمد، احمد دانیال، فہیم اشرف، فخر زمان، حسن نواز، حسین طلعت، خوشدل شاہ، محمد عباس آفریدی، محمد حارث (وکٹ کیپر)، محمد نواز، صاحبزادہ فرحان (وکٹ کیپر)، صائم  ایوب، سلمان مرزا اور سفیان مقیم۔

پاکستان اور بنگلہ دیش کے درمیان ٹی ٹوئنٹی سیریز کے بعد قومی ٹیم امریکا روانہ ہوگی، جہاں وہ ویسٹ انڈیز کے خلاف تین ٹی ٹوئنٹی میچز یکم سے 4 اگست تک فلوریڈا میں کھیلے گی۔ بعدازاں دونوں ٹیموں کے درمیان تین ون ڈے میچز 8 سے 12 اگست تک ٹرینیڈاڈ اینڈ ٹوباگو میں شیڈول ہیں۔ پی سی بی کے مطابق یہ سیریز نوجوان کھلاڑیوں کو بین الاقوامی سطح پر خود کو منوانے کا بہترین موقع فراہم کرے گی، ۔جبکہ میگا ایونٹس کی تیاریوں میں بھی یہ دورہ اہم کردار ادا کرے گا۔