شبمن گل کی بڑی غلطی ، بی سی سی آئی کو 250 کروڑ روپے کا نقصان؟

ایجبسٹن ٹیسٹ میں تاریخی کارکردگی دکھا کر بھارت کو شاندار فتح دلانے والے کپتان شبمن گل ایک سنگین تنازعے کا شکار ہو گئے ہیں، جو نہ صرف ان کے لیے بلکہ بی سی سی آئی کے لیے بھی مالی طور پر بڑا دھچکا بن سکتا ہے۔ ایجبسٹن میں جاری دوسرے ٹیسٹ میچ میں شبمن گل نے دونوں اننگز میں مجموعی طور پر 430 رنز اسکور کیے , پہلی اننگز میں 269 اور دوسری میں 161۔ ان کی بے مثال بیٹنگ نے میچ کا نقشہ بدل دیا اور بھارت کو فیصلہ کن برتری دلائی۔

تاہم، بھارت کی دوسری اننگز کے دوران جب ٹیم نے 427/6 پر اننگز ڈیکلیئر کی، تو شبمن گل نے نائکی (Nike) کی ٹائٹس پہن کر میدان میں قدم رکھا، جو بی سی سی آئی کے اسپانسر معاہدے کی کھلی خلاف ورزی ہے۔

 ایڈیڈاس سے معاہدہ، شبمن گل کی خلاف ورزی

واضح رہے کہ بی سی سی آئی کا موجودہ کِٹ اسپانسر ایڈیڈاس (Adidas) ہے، اور معاہدے کے تحت کھلاڑیوں کو صرف ایڈیڈاس کی پراڈکٹس استعمال کرنے کی اجازت ہے۔
شبمن گل کے نائکی گیئر پہننے سے ایڈیڈاس کے ساتھ کیا گیا 250 کروڑ روپے کا اسپانسرشپ معاہدہ خطرے میں پڑ سکتا ہے۔ یہ معاہدہ 2023 سے مارچ 2028 تک کے لیے ہے، اور اس میں صاف طور پر طے ہے کہ اسپانسر شپ کے دوران کسی اور برانڈ کی نمائندگی یا استعمال ممنوع ہے۔

 قانونی پہلو اور ممکنہ نتائج

قانونی اعتبار سے ایڈیڈاس کو مکمل اختیار حاصل ہے کہ وہ اس خلاف ورزی پر

• معاہدہ ختم کرے

• ہرجانے کا دعویٰ دائر کرے

• یا شدید مالی پابندیاں عائد کرے

لیکن زمینی حقائق یہ ہیں کہ بی سی سی آئی دنیا کا سب سے مالدار کرکٹ بورڈ ہے، اور ایڈیڈاس کے لیے اس شراکت داری میں بے شمار تجارتی فوائد پوشیدہ ہیں۔ اسی لیے امکان ہے کہ کمپنی معاملے کو باضابطہ نوٹس یا وارننگ کے ذریعے حل کرنے کی کوشش کرے گی۔ بی سی سی آئی کی جانب سے شبمن گل کو نوٹس جاری کیے جانے کا امکان ہے تاکہ وہ اپنی وضاحت دے سکیں۔ اندرونی ذرائع کے مطابق، بورڈ اس واقعے کو سختی سے لے رہا ہے کیونکہ اسپانسر کے اعتماد کو قائم رکھنا ان کے لیے اہم ترین ہے۔