کرکٹ شائقین کے لیے بڑی خوشخبری سامنے آئی ہے، روایتی حریف پاکستان اور بھارت کے درمیان ایشیا کپ 2025 کا بڑا ٹاکرا 7 ستمبر کو دبئی میں کھیلا جائے گا۔ بھارتی میڈیا رپورٹس کے مطابق ایشیا کپ کے شیڈول کو حتمی شکل دے دی گئی ہے، اور ایونٹ کا آغاز 5 ستمبر سے ہوگا، جب کہ فائنل 21 ستمبر کو منعقد کیا جائے گا۔ رپورٹس میں یہ بھی بتایا گیا ہے کہ اگر پاکستان اور بھارت کی ٹیمیں ابتدائی مرحلے سے آگے بڑھ کر سپر فور میں جگہ بناتی ہیں، تو ان کے درمیان ایک اور ہائی وولٹیج مقابلہ 14 ستمبر کو شیڈول کیا گیا ہے۔ ایشیا کپ 2025 کی میزبانی اگرچہ بھارت کے پاس ہے، تاہم موجودہ سیاسی حالات اور انتظامی سہولیات کو مدنظر رکھتے ہوئے ایونٹ متحدہ عرب امارات میں منعقد کیا جائے گا۔ ایشین کرکٹ کونسل (اے سی سی) کی جانب سے آئندہ چند روز میں ایونٹ کا باضابطہ شیڈول جاری کیے جانے کی توقع ہے۔
کرکٹ ماہرین کے مطابق ایشیا کپ ایک بار پھر دنیائے کرکٹ میں سنسنی اور جوش و خروش پیدا کرے گا۔ خاص طور پر پاکستان اور بھارت کے درمیان ہونے والے میچز نہ صرف دونوں ممالک بلکہ دنیا بھر کے شائقین کی توجہ کا مرکز بنیں گے۔ ماہرین کا کہنا ہے کہ ان مقابلوں میں نہ صرف کرکٹ کا اعلیٰ معیار دیکھنے کو ملے گا بلکہ روایتی حریفوں کے درمیان تاریخی کرکٹنگ جذبات بھی عروج پر ہوں گے۔پاکستان کرکٹ بورڈ اور بھارتی بورڈ دونوں اپنی ٹیموں کی بھرپور تیاری میں مصروف ہیں، جب کہ دبئی میں سیکیورٹی، سہولیات اور ٹکٹنگ کے حوالے سے انتظامات کو حتمی شکل دی جا رہی ہے۔
Discussion about this post