کراچی : 32 اہم سڑکوں سے پارکنگ فیس مکمل طور پر ختم

کراچی کے شہریوں کے لیے ایک خوش آئند خبر سامنے آئی ہے، جہاں شہر کی 106 مرکزی سڑکوں میں سے 32 مقامات پر پارکنگ فیس مکمل طور پر ختم کر دی گئی ہے۔ اس فیصلے کا باضابطہ نوٹیفکیشن بھی جاری کر دیا گیا ہے، جس کے مطابق مختلف اضلاع میں مخصوص مقامات پر شہری بلا معاوضہ پارکنگ کی سہولت حاصل کر سکیں گے۔

نوٹیفکیشن کے مطابق:

• ضلع جنوبی میں 3 مقامات

• ضلع کیماڑی میں 2 مقامات

• ضلع وسطی میں 5 مقامات

• ضلع ملیر اور کورنگی میں 7 مقامات

• ضلع شرقی میں سب سے زیادہ، یعنی 15 مقامات پر پارکنگ مفت ہوگی۔

ضلع جنوبی، وسطی اور شرقی کی 11 وال باؤنڈری پارکنگ سائٹس پر فیس بدستور نافذ رہے گی، تاہم کئی معروف اور مصروف مقامات پر اب شہریوں کو پارکنگ فیس ادا نہیں کرنی پڑے گی۔

چند نمایاں مفت پارکنگ مقامات درج ذیل ہیں:

• ایم اے جناح روڈ پر جیلانی سینٹر موبائل مارکیٹ، ناز پلازہ سے آمنہ ٹاور تک اور کوثر میڈیکو سے ایم ڈبلیو ٹاور تک پارکنگ بالکل فری ہوگی۔

• حب ریور روڈ پر شارجہ مال سے کوہِ نور ہال تک

• ایم اے جناح روڈ پر کے پی ٹی گیٹ نمبر 1 سے شیل پمپ تک

• ضلع وسطی میں ہارون شاپنگ مال، سرینا مارکیٹ، لیاقت آباد سپر مارکیٹ سے لیاقت آباد نمبر 10 تک (ایس ایم توفیق روڈ)

• شاہراہِ پاکستان پر چیز سپر اسٹور

• راشد منہاس روڈ پر سینٹرم شاپنگ مال

• نارتھ کراچی میں کفایہ اور اومیگا مال پر بھی پارکنگ فری ہوگی۔

یہ اقدام شہریوں کو سہولت فراہم کرنے، غیر قانونی چارجز کے خاتمے اور ٹریفک نظام میں بہتری کی جانب ایک مثبت قدم ہے۔ اب شہری ان مخصوص علاقوں میں بغیر کسی اضافی مالی بوجھ کے اپنی گاڑی پارک کر سکیں گے، جس سے روزمرہ کی زندگی میں آسانی پیدا ہوگی۔