پاکستان کو پرو ہاکی لیگ میں شرکت کی دعوت

انٹرنیشنل ہاکی فیڈریشن (FIH) نے پاکستان ہاکی فیڈریشن (PHF) سے باضابطہ رابطہ کر کے قومی ٹیم کو پرو ہاکی لیگ میں شرکت کی دعوت دے دی ہے، جو پاکستان ہاکی کے لیے ایک بڑی خوشخبری ہے۔یہ پیشرفت اس وقت سامنے آئی جب نیشنز ہاکی کپ کی فاتح ٹیم نیوزی لینڈ نے مالی مشکلات کے باعث پرو لیگ سے دستبرداری اختیار کر لی۔ قانون کے مطابق، فاتح ٹیم کے انخلاء کی صورت میں رنر اپ ٹیم کو لیگ میں شرکت کا حق حاصل ہوتا ہے، یوں پاکستان کو پرو لیگ میں کھیلنے کا موقع مل گیا۔

رینکنگ میں بہتری کا سنہری موقع

پاکستان اس وقت FIH عالمی رینکنگ میں 13ویں پوزیشن پر موجود ہے، اور پرو لیگ جیسے بڑے ایونٹ میں شرکت سے نہ صرف کھلاڑیوں کو عالمی سطح پر کھیلنے کا قیمتی تجربہ حاصل ہوگا، بلکہ رینکنگ میں نمایاں بہتری کا بھی امکان ہے۔  دوسری جانب، پاکستان ہاکی ٹیم کا اگلا بڑا انٹرنیشنل ایونٹ ایشیاکپ ہے، جو اگست–ستمبر 2025 میں بھارت میں شیڈول ہے۔ تاہم، پاکستان اور بھارت کے درمیان کشیدہ تعلقات کے سبب قومی ٹیم کی شرکت غیر یقینی صورتحال سے دوچار ہے۔ پاکستان ہاکی فیڈریشن کی کوشش ہے کہ ایشیاکپ کو نیوٹرل وینیو پر منتقل کیا جائے تاکہ قومی ٹیم کی شرکت یقینی بنائی جا سکے۔ ایشیاکپ، ورلڈکپ 2026 کے کوالیفائنگ راؤنڈ کے لیے نہایت اہمیت رکھتا ہے۔