پاکستان کی پہلی عالمی باکسنگ چیمپیئن عالیہ سومرو کو ملنے والی مبینہ دھمکیوں پر کراچی پولیس حرکت میں آ گئی ہے۔ ڈی آئی جی ساؤتھ سید اسد رضا نے واقعے کا نوٹس لیتے ہوئے ایس ایس پی سٹی عارف عزیز کو فوری طور پر مکمل تحقیقات کی ہدایت جاری کر دی ہے اور ملزمان کے خلاف سخت قانونی کارروائی کا عندیہ دیا ہے۔ یہ پیشرفت اس وقت سامنے آئی جب عالیہ سومرو نے انسٹاگرام پر جاری ایک ویڈیو بیان میں انکشاف کیا کہ انہیں اور ان کے اہلِ خانہ کو ایک شخص کی جانب سے مسلسل ہراساں کیا جا رہا ہے، جو خود کو میڈیا ورکر ظاہر کرتا ہے لیکن دراصل گینگ وار کے ایک مبینہ سہولت کار کے طور پر جانا جاتا ہے۔ عالیہ سومرو نے ویڈیو میں جذباتی انداز میں کہا:
"مجھے کسی سیاسی یا لسانی تنازع کا حصہ نہ بنایا جائے۔ میرے خلاف پوری مشینری کیوں متحرک ہے؟ مجھے اور میرے گھر والوں کو جان کا خطرہ ہے۔”
View this post on Instagram
انہوں نے دعویٰ کیا کہ مخصوص عناصر نہ صرف ان کے خلاف بے بنیاد پروپیگنڈا پھیلا رہے ہیں بلکہ انہیں خدشہ ہے کہ ان کی جان کو بھی نقصان پہنچایا جا سکتا ہے۔ عالیہ نے سندھ پولیس کے اعلیٰ حکام سے فوری تحفظ اور قانونی مدد کی اپیل کی ہے۔ ڈی آئی جی ساؤتھ کی جانب سے جاری بیان میں کہا گیا ہے کہ جنوبی زون پولیس نے عالیہ سومرو سے براہِ راست رابطہ کیا ہے اور انہیں مکمل تحفظ اور تعاون کی یقین دہانی کرائی گئی ہے۔ ڈی آئی جی سید اسد رضا نے عالیہ سومرو کو "پاکستان کی باہمت اور باوقار خواتین کی علامت” قرار دیتے ہوئے کہا:
"خواتین کو زندگی کے ہر میدان میں آگے بڑھنے کا حق حاصل ہے، اور پولیس ان کے شانہ بشانہ کھڑی ہے۔”
واضح رہے کہ عالیہ سومرو نے رواں برس کے آغاز میں صرف 45 سیکنڈز میں تھائی لینڈ کی حریف کو ناک آؤٹ کر کے ڈبلیو بی اے ایشیا 105 پاؤنڈ کیٹیگری میں تاریخی کامیابی حاصل کی تھی، اور یوں وہ عالمی باکسنگ ٹائٹل جیتنے والی پہلی پاکستانی خاتون بن گئی تھیں۔ ان کی شاندار کارکردگی کے اعتراف میں حکومت سندھ نے بھی انہیں آئندہ اگست میں دبئی میں ہونے والے بین الاقوامی باکسنگ مقابلے میں شرکت کے لیے 47 لاکھ روپے کی اسپانسرشپ دینے کا اعلان کیا ہے، جہاں ان کا مقابلہ ایک بھارتی باکسر سے متوقع ہے۔
Discussion about this post