وزیراعظم شہباز شریف نے ایران پر اسرائیلی حملے کی سخت ترین الفاظ میں مذمت کرتے ہوئے اسے انتہائی تشویشناک، غیرذمہ دارانہ اور قابلِ مذمت عمل قرار دیا ہے۔ اپنے بیان میں وزیراعظم نے ایران میں جانی و مالی نقصان پر ایرانی عوام سے گہری ہمدردی اور یکجہتی کا اظہار کیا۔ وزیراعظم نے کہا کہ:
"یہ حملہ ایک سنگین خطرے کی علامت ہے، خدشہ ہے کہ پہلے سے غیر مستحکم خطہ مزید غیر مستحکم ہو سکتا ہے۔”
انہوں نے اقوام متحدہ اور عالمی برادری سے اپیل کی کہ وہ کشیدگی کو مزید بڑھنے سے روکنے کے لیے فوری اقدامات کرے، تاکہ علاقائی و عالمی امن کو لاحق خطرات کا تدارک کیا جا سکے۔ اسی تناظر میں نائب وزیراعظم و وزیر خارجہ اسحاق ڈار نے بھی اسرائیلی حملے کو ایران کی خودمختاری کی کھلی خلاف ورزی قرار دیتے ہوئے کہا کہ:
"یہ ناقابلِ جواز، قابلِ نفرت اور بین الاقوامی قانون کی دھجیاں اُڑانے والا اقدام ہے، جو انسانیت کے ضمیر کو جھنجھوڑنے کے مترادف ہے۔”
اسحاق ڈار نے کہا کہ ایسے جارحانہ اقدامات نہ صرف خطے کے امن کو متاثر کرتے ہیں بلکہ عالمی سلامتی کے لیے بھی سنگین خطرہ بن سکتے ہیں۔ انہوں نے اس موقع پر پاکستان کی جانب سے ایرانی حکومت اور عوام کے ساتھ مکمل یکجہتی کا اظہار کرتے ہوئے عالمی اداروں پر زور دیا کہ وہ اسرائیلی جارحیت کے خلاف واضح مؤقف اختیار کریں اور عالمی قوانین کے تحفظ کو یقینی بنائیں۔
Discussion about this post