سعودی عرب نے حج 2025 کے موقع پر صحت و سلامتی کے میدان میں ایک تاریخی اور انقلابی قدم اٹھاتے ہوئے دنیا کی سب سے جدید اسمارٹ موبائل اسٹروک ایمبولینس متعارف کرا دی ہے، جو موقع پر ہی فالج (stroke) کی فوری تشخیص اور ابتدائی علاج فراہم کرنے کی صلاحیت رکھتی ہے۔
سبق ویب سائٹ کی رپورٹ کے مطابق، سعودی وزارتِ صحت کی جانب سے مکہ مکرمہ میں حجاج کرام کی سہولت کے لیے یہ جدید موبائل یونٹ پیش کیا گیا ہے، جو مشرق وسطیٰ اور شمالی افریقہ میں اپنی نوعیت کی پہلی اسٹروک ایمبولینس ہے۔ یہ ایمبولینس ایک مکمل طبی ٹیم کے ساتھ جدید ترین طبی آلات سے لیس ہے۔ اس جدید یونٹ میں دماغی اعصاب کے ماہر (ویکیولر نیورولوجسٹ)، کریٹیکل کیئر نرس، سی ٹی اسکین ماہر اور ایمبولینس ٹیکنیشن شامل ہیں، جو مریض کو اسپتال منتقل کیے بغیر موقع پر دماغی معائنہ اور فوری علاج فراہم کرتے ہیں۔ اس سے فالج کے مریض کی جان بچانے اور مکمل صحت یابی کے امکانات نمایاں طور پر بڑھ جاتے ہیں۔ ایمبولینس میں سی ٹی اسکین، ایم آر آئی، الٹرا ساؤنڈ، کیروٹڈ آرٹری امیجنگ اور دیگر جدید تشخیصی آلات نصب ہیں، جو فالج کی ابتدائی علامات کی فوری شناخت اور بروقت مداخلت میں مددگار ثابت ہوتے ہیں۔ یہ سہولت حج کے دوران عازمین کی جان و مال کی حفاظت، فوری طبی امداد اور جدید میڈیکل ٹیکنالوجی میں سعودی عرب کی دلچسپی کا ایک روشن آئینہ ہے، جو دنیا بھر میں صحت کی خدمات کے معیار کو بلند کرنے کا پیغام دیتی ہے۔
Discussion about this post