وزیراعظم شہباز شریف نے نئے چیف الیکشن کمشنر اور دو ارکان کی تقرری کے لیے اپوزیشن لیڈر عمر ایوب کو مشاورت کی دعوت دے دی ہے۔ وزیراعظم کی جانب سے لکھے گئے خط میں کہا گیا ہے کہ چیف الیکشن کمشنر اور دو ممبران کی مدت 26 جنوری کو ختم ہو چکی ہے، تاہم وہ آئین کے آرٹیکل 215 کے تحت تاحال فرائض انجام دے رہے ہیں۔
وزیراعظم کا کہنا ہے کہ آئین کے آرٹیکل 218 کے تحت ان عہدوں پر تقرری کے لیے ناموں کی تجویز پارلیمانی کمیٹی کو بھیجی جانی چاہیے، جس کے لیے اپوزیشن سے مشاورت ضروری ہے۔ شہباز شریف نے خط میں اپوزیشن لیڈر عمر ایوب کو دعوت دی ہے کہ وہ ملاقات کے لیے وقت مقرر کریں تاکہ ان اہم تقرریوں کے لیے آئینی تقاضے پورے کیے جا سکیں اور اتفاق رائے سے فیصلے ممکن ہو سکیں۔ ذرائع کا کہنا ہے کہ حکومت انتخابی عمل کو شفاف اور متفقہ بنانے کے لیے اپوزیشن کے ساتھ ہر ممکن رابطہ چاہتی ہے، جبکہ سیاسی حلقوں میں اس اقدام کو ایک مثبت پیش رفت قرار دیا جا رہا ہے۔
Discussion about this post