فضائی حدود کی مکمل بحالی کے بعد فلائٹ آپریشن میں بہتری

پاک بھارت جنگ بندی کے بعد فلائٹ آپریشن کی بحالی سے فضائی سفر کی صورت حال میں بہتری آنا شروع ہو گئی ہے۔ بیک لاگ اور دیگر تکنیکی مسائل کے باعث گزشتہ چند دنوں کے دوران متعدد پروازیں منسوخ یا تاخیر کا شکار ہوئیں، تاہم اب فضائی شیڈول میں واضح بہتری دیکھی جا رہی ہے۔ ملک بھر کے مختلف ایئرپورٹس پر فلائٹس کی منسوخی کی تعداد کم ہوکر 50 رہ گئی ہے، جو گزشتہ روز 150 تک جا پہنچی تھی۔ مزید خوش آئند بات یہ ہے کہ 12 غیر ملکی ایئرلائنز نے بھی اپنی پروازیں بحال کر دی ہیں۔ پاکستان ایوی ایشن اتھارٹی (پی اے اے) کے ذرائع کا کہنا ہے کہ حج پروازوں کو بھی معمول پر لانے کے لیے بھرپور کوششیں جاری ہیں۔ آج کے دن اسلام آباد سے صرف 23، لاہور سے 14 اور کراچی سے 15 پروازیں منسوخ ہوئیں۔ پشاور کی 4، سیالکوٹ کی 2 اور فیصل آباد کی ایک پرواز منسوخ ہوئی۔ سیالکوٹ ایئرپورٹ سے شارجہ، دمام اور کویت کی 3 پروازیں آپریشنل وجوہات کی بنا پر لاہور منتقل کر دی گئی ہیں۔ یاد رہے کہ گزشتہ ہفتے پاک بھارت کشیدگی کے باعث فضائی آپریشن بارہا معطل اور بحال ہوتا رہا، جس کی وجہ سے ایئرلائنز کو شدید مشکلات کا سامنا کرنا پڑا۔۔ تاہم جنگ بندی کے اعلان کے بعد پاکستان نے اپنی فضائی حدود مکمل طور پر تمام پروازوں کے لیے کھول دی ہیں۔ اگرچہ کچھ پروازیں اب بھی تاخیر یا منسوخی کا شکار ہیں، لیکن توقع کی جا رہی ہے کہ ایک سے دو روز میں فضائی نظام مکمل طور پر معمول پر آجائے گا، اور مسافروں کو درپیش مشکلات ختم ہو جائیں گی۔ ۔