امریکا : پاکستانی کمیونٹی کی کامیابی کی خوشی اور افواجِ پاکستان کو خراجِ تحسین

نیویارک میں پاکستانی کمیونٹی نے امریکن پاکستانی پبلک افیئرز کمیٹی (اے پی پی اے سی ) کے زیرِ اہتمام ایک تاریخی تقریب کا انعقاد کیا۔ اس تقریب کی صدارت "اے پی پی اے سی  کے صدر ڈاکٹر پرویز اقبال نے کی، جس میں چیئرمین ڈاکٹر اعجاز احمد، چوہدری اکرم، ناہید بھٹی، اسد چوہدری، سونی دستگیر، محسن شاہ، وکیل انصاری، ڈاکٹر فراز، عتیق قادری، زمان آفریدی، طاہرہ دین، ڈاکٹر حسن ڈوگر، عون نقوی، ہمایوں شبیر، راحیلہ اسلم، روبی ملک، راشد انصاری، نواب دین، ڈاکٹر صفدر چڈا، بد ر بھٹی، ہارون رامے، ڈاکٹر بشیراختر ظہیر مہر، چوہدری فاروق وڑائچ، شفقت تنویر، عاطف الرحمان، جبران اکرم اور دیگر اہم شخصیات اور کمیونٹی کے ارکان نے شرکت کی۔ ۔ڈاکٹر پرویز اقبال نے اپنی تقریر میں تمام کمیونٹی رہنماؤں کو خوش آمدید کہتے ہوئے پاکستانی قوم، خصوصاً اس کی افواج کی بے مثال بہادری اور عزم کو سراہا۔ انہوں نے پاکستان کی فوج کی جانب سے ملک کی خودمختاری کے تحفظ اور بھارت کی جارحیت کا مقابلہ کرنے کی کوششوں کو خراجِ تحسین پیش کیا۔ ڈاکٹر پرویز اقبال نے صدر ٹرمپ، وائس پریذیڈنٹ جے ڈی وینس اور سیکریٹری آف اسٹیٹ مارکو روبیو کی جانب سے پاکستان کے حق میں کی جانے والی بروقت کوششوں کو سراہا۔

ڈاکٹر اعجاز احمد، چیئرمین اے پی پی اے سی  نے بھی پاکستان کی قومی اور عسکری قیادت کی بہادری کو سلام پیش کیا اور پاکستان کی افواج کی عظمت کو اجاگر کیا۔ انہوں نے صدر ٹرمپ اور ان کی انتظامیہ کی عالمی سطح پر امن کے قیام میں ادا کی جانے والی اہم کردار کو سراہا اور پاکستان کے خطے میں پائیدار امن کے لیے اپنی کوششوں کو جاری رکھنے کی ضرورت پر زور دیا۔ پاکستانی قونصل جنرل عامر احمد اتوزئی نے پاکستانی امریکن کمیونٹی کی تنظیموں اور رہنماؤں کا شکریہ ادا کیا جنہوں نے مشکل حالات میں پاکستان اور اس کی مسلح افواج کے ساتھ کھڑے ہو کر قوم کے سفیر کا کردار ادا کیا۔

انہوں نے کمیونٹی سے کہا کہ وہ امریکی عوام کو پاکستان کی امن کی خواہشات اور کردار سے آگاہ کریں اور بھارتی پروپیگنڈے کا مقابلہ کریں۔ تقریب میں پاکستان کی افواج کی بہادری اور جرات کو سراہا گیا، اور شرکاء نے ملکی خودمختاری کے تحفظ کے لیے افواجِ پاکستان کے ساتھ اپنے عزم کو دہرایا۔ کمیونٹی رہنماؤں نے کہا کہ افواجِ پاکستان قومی و ملکی سلامتی کی ضامن ہیں اور اوورسیز کمیونٹی ہمیشہ شانہ بشانہ ان کے ساتھ کھڑی رہے گی۔ آخر میں قونصل جنرل عامر اتوزئی، ڈاکٹر اعجاز احمد، ڈاکٹر پرویز اقبال اور دیگر رہنماؤں نے مل کر پاکستان کی فتح کا کیک کاٹا۔ تقریب کے دوران "پاکستان زندہ باد” اور "پاکستان فوج پائندہ باد” کے نعروں سے فضا گونج اٹھی، جو پاکستانی امریکن کمیونٹی کے اتحاد اور فخر کی عکاسی کرتا تھا۔