8ویں آرمی ٹیم اسپرٹ مقابلے، آرمی چیف بطور مہمان خصوصی شریک

انٹر سروسز پبلک ریلیشنز (آئی ایس پی آر) کے مطابق کھاریاں گیریژن میں  60 گھنٹے طویل پیٹرولنگ مشق کا مقصد جدید جنگی مہارتوں کو بڑھانا تھا۔  مشق میں پاک فوج کی 7 ٹیم ، پاک بحریہ کی ایک ٹیم اور دوست ممالک کی 15 ٹیمیں شامل رہیں۔  یہ مشق پنجاب کے نیم پہاڑی علاقوں میں کی گئی۔  آئی ایس پی آر کے مطابق مشق میں بحرین، بیلاروس، چین سعودی عرب مالدیپ، مراکش، نیپال، قطر، سری لنکا، ترکیہ، امریکا اور ازبکستان شامل ہوئے۔ جبکہ  بنگلا دیش، مصر، جرمنی، کینیا، میانمار ،تھائی لینڈ کے نمائندوں نے بطور مبصر مشاہدہ کیا۔

تقریب میں بین الاقوامی مبصرین اور دفاعی اتاشیوں نے بھی شرکت کی اور تقریب کے انعقاد کو سراہا۔ اس موقع پر گفتگو کرتے ہوئے آرمی چیف جنرل عاصم منیر کا کہنا تھا کہ ایسی مشقیں پیشہ ورانہ فوجی مہارتوں اور حکمتِ عملی سیکھنے کا صحیح فورم ہیں جو جنگ کے بدلتے حالات میں ٹیم اسپرٹ کو فروغ دیتی ہیں۔اس مقصد کے لیے پاک فوج نے کردار، جرأت اور قابلیت کی بھرپور صفات کو برقرار رکھا ہے۔ آئی ایس پی آر کے مطابق آرمی چیف نے مشق کے شرکا کو انفرادی اور ٹیم ایوارڈز سے نوازا۔