ہیوسٹن کا سالانہ افطار ڈنر، مذہبی ہم آہنگی کی علامت

ہیوسٹن میں امریکہ کے سب سے بڑے  سالانہ افطار ڈنر کا انعقاد کیا گیا۔ مئیر ہیوسٹن اور سسٹر سٹیز ایسوسی ایشنز  کے اشتراک سے منعقد ہونے والے ہیوسٹن افطار ڈنر میں ڈھائی ہزار سے زائد افراد نے شرکت کی۔ تقریب کے مہمان خصوصی مئیر ہیوسٹن جان وٹ مائیر  تھے۔ افطار ڈنر میں رکن کانگریس ایل گرین،امریکی بزنس مین جاوید انور اور بزنس ٹائیکون تنویر احمد سمیت کئی سفارت کاروں، اعلیٰ سرکاری حکام اور عمائد ین کمیونٹی نے بھی شرکت کی۔

اس موقع پر گورنر ٹیکساس گریک ایبٹ کا ویڈیو پیغام بھی بڑی اسکرین پرپیش کیا گیا  جس میں گورنر نے امریکی مسلمانوں کو رمضان کی مبارک باد دی۔  اسرائیل فلسطین تنازعے پر مظلوم فلسطینیوں کیلے علیحدہ ریاست کے قیام کیلے جرتمندانہ مطالبہ کرنے والے امریکہ کے واحد رکن ایل گرین کی اسٹیج پر آمد کے ساتھ ہی پورا ہال ایل گرین ایل گرین کے خیر مقدمی نعروں سے گونجتا رہا۔

اس موقع پر مئیر جان وٹ مائیر   نے افطار کے منظم انعقاد پر کوآرڈینیٹر سعید شیخ کو خراج تحسین پیش کیا۔ ان کا کہنا تھا کہ یہ افطار مئیر کا افطار نہیں بلکہ کمیونٹیز کا افطار ہے جو مذہبی ہم آہنگی رواداری اور امن ویکجہتی کی علامت ہے۔

 ہیوسٹن  افطار ڈنر کے کوآرڈینیٹر سعید شیخ نے اپنی خطاب میں  بین الامذاہب ہم آہنگی کے متعلق افطار ڈنر کی افادیت کو نمایاں کیا۔ اُن کے مطابق افطار ڈنر کا شاندار انعقاد اس بات کی واضح مثال ہے کہ امریکی مسلمان کمیونٹی امریکہ میں مذہبی ہم آہنگی اور امن و رواداری کے لیے کوشاں ہے۔ رکن ایل گرین کے مطابق وہ مسلمان ممالک پر امریکہ کیلے سفری پابندی سے لاعلم ہیں لیکن مذہب کی بنیاد پر اگر سفری پابندی عائد کی جاتی ہے تو وہ  اس کی حمایت نہیں کریں گے۔ افطار ڈنر سے خطاب کرتے ہوئے ممتاز بزنس مین سید جاوید انور نے سعید شیخ اور ان کی ٹیم کو افطار ڈنر کے منظم انعقاد پر سراہتے ہوئے کہا کہ افطار ڈنر کا حصہ ہونا ان کیلے باعث افتخار ہے۔ افطار ڈنر سے اسلامک سوسائٹی آف گریٹر ہیوسٹن کے صدر عمران غازی اور عرب کمیونٹی کے معروف رہنما احمد یاسین نے بھی خطاب کیا۔