سراغ رساں کتوں نے گارڈن سے لاپتا 2 بچوں کی نشاندہی کردی

گارڈن کے علاقے سے گزشتہ ماہ کی  14 تاریخ سے گم ہونے والے  دو کمسن بچوں کو پولیس تاحال بازیاب نہیں کرا سکی ، پولیس نے بچوں کی تلاش میں لیاری ندی اور اطراف میں کھدائی کی اور سراغ رساں کتوں کی مدد بھی حاصل کی لیکن اس کے باوجود کامیابی نہ ملی۔ پولیس حکام کے مطابق گارڈن سے لاپتا دو بچوں 5 سالہ علیان اور 6 سالہ عمر علی کی تلاش کے سلسلے میں حیدر آباد سے لائے گئے سراغ رساں کتوں کی مدد بھی لی گئی تھی ، کتے کو بچوں کے کپڑے سنگھائے گئے تو سراغ رساں کتا لیاری کشتی مسجد کے قریب رک گیا اور بھونکنا شروع کر دیا۔ عینی شاہد نے بھی بچوں کے کشتی مسجد کے قریب دیکھے جانے کی نشان دہی کی تھی تاہم بچے وہاں بھی نہیں ملے ، مشینری کی مدد سے ندی کو صاف کیا گیا ، ندی میں مزید مقامات کو صاف کر کے تلاشی کا عمل جاری ہے۔ واضح رہے کہ کراچی میں بچوں کے اغوا و لاپتا ہونے کے واقعات کے پیش نظر کراچی کے تمام تھانوں میں سیکیورٹی الرٹ جاری کر دیا گیا ہے جس میں کہا گیا ہے کہ بچوں کے لاپتا ہونے کی صورت میں فورا مددگار 15 پر اطلاع دیں۔سیکیورٹی کے حوالے سے اسکول اور مدارس کے انتظامیہ کو بھی لیٹر جاری کیا گیا ہےکہ بچوں کو والدین یا ان کی گاڑی والے کے علاوہ کسی کے حوالے نہ کریں۔