بجلی کے بڑھتے بل اور ٹیکس پر ملک گیر ہڑتال

جماعت اسلامی، اپوزیشن جماعتوں اور تاجر تنظیموں کی کال پر کراچی سمیت مختلف شہروں میں بازار اور کاروباری مراکز بند ہیں۔۔ ہڑتال کی وجہ سے کچھ علاقوں میں اسکولز بھی بند کردئیے گئے ہیں۔ اسلام آباد میں احتجاج کے خطرے  کے باعث ریڈ زون کے راستوں کو کنٹینر رکھ کر بند کردیا گیا ہے۔اسلام آباد کے مختلف کاروباری مراکز میں تاجروں کی شٹر ڈاؤن ہڑتال ہے۔ آبپارہ مرکز ،جی نائن کراچی کمپنی سمیت مختلف علاقوں میں دکانیں بند ہیں۔ دوسری جانب  آل پاکستان انجمن تاجران سندھ نے آج شٹر ڈاؤن ہڑتال کی مکمل حمایت کا اعلان کیا ہے۔ پشاور میں بھی تاجروں کی جانب سے مختلف بازار بند رکھے گئے ہیں۔ جڑواں شہر راولپنڈی میں بجلی کے بھاری بلوں اور ٹیکسوں کے خلاف تاجروں کی ہڑتال ہے۔ بڑے تجارتی مراکز ،شاپنگ مالز، مارکیٹس، ہول سیل، آڑھت منڈیاں بھی بند ہیں۔ ملتان ،لاہور ،کوئٹہ ،گوجرانوالہ ، فیصل آباد ، گجرات ، سرگودھا، بہاولپور ، ساہیوال ،ہرنائی ،مالاکنڈ ڈویژن ، اندرون سندھ اور ملک کے دیگر بڑے اور چھوٹے شہروں میں بھی ہڑتال ہے۔