ارشد ندیم آج رات ایک بجے وطن لوٹیں گے

پیرس اولمپکس میں طلائی تمغہ حاصل کرنے والے ارشد ندیم ہفتے کی رات ایک بجے براستہ استنبول لاہور پہنچیں گے۔  چیئرمین ساؤتھ ایشین ایتھلیٹکس محمد اکرم ساہی ارشد کو لے کر وطن پہنچیں گے۔وطن واپسی پر گولڈ میڈلسٹ ارشد ندیم کا شاندار استقبال کیا جائے گا، کوچ سلمان بٹ بھی اُن کے ہمراہ وطن پہنچیں گے۔ دوسری جانب ارشد ندیم پر انعامات کی بارش مسلسل جاری ہے۔ انٹرنیشنل ایسوسی ایشن آف ایتھلیٹکس فیڈریشنز نے بھی اعلان کررکھا ہے وہ 2024 پیرس اولمپکس میں گولڈ میڈل جیتنے والوں کو 50 ہزار ڈالر انعام دے گی۔ پنجاب حکومت نے ارشد ندیم کو 10 کروڑ روپے دینے کا اعلان کیا ہے ساتھ ہی ان کے نام سے منسوب اسپورٹس سٹی بنانے کا بھی کہا جارہا ہے۔ گورنر پنجاب سردار سلیم حیدر خان نے ارشد ندیم کیلئے 20 لاکھ روپے انعام کا اعلان کیا۔  سندھ حکومت نے ارشد ندیم کیلئے 5 کروڑ روپے انعام کا اعلان کیا جبکہ میئر کراچی مرتضیٰ وہاب نے ارشد ندیم کے نام سے کراچی میں اسپورٹس اکیڈمی کھولنے کا اعلان کیا۔ سکھر کے میئر نے ارشد ندیم کو سونے کا تاج پہنانے کا اعلان کیا ہے۔

دوسری جانب  گورنر سندھ کامران ٹیسوری نے اولمپئین ارشد ندیم کیلئے 20 لاکھ روپے انعام کا اعلان کیا۔ علی ظفر نے سوشل میڈیا پر اپنے پیغام میں کہا کہ تاریخی کامیابی پر ارشد ندیم کو اپنی فاؤنڈیشن کے ذریعے 10 لاکھ روپے رقم بطورِ انعام نقد رقم دینے کا وعدہ کیا۔ اسی طرح کراچی پریس کلب نے اولمپکس میں گولڈ میڈل جیتنے پر ارشد ندیم کو پریس کلب کی اعزازی ممبر شپ دینے کا اعلان کر دیا۔کرکٹر احمد شہزاد نے 10 لاکھ، نجی ٹی وی چینل نے بھی 10 لاکھ جبکہ پاکستان گیس اینڈ آئل نے زندگی بھر کیلئے مفت پیٹرول دینے کا اعلان کررکھا ہے۔