گرمی کا زور اس ہفتے بھی

 سندھ اور پنجاب کے کچھ حصے سخت ہیٹ ویو کی لپیٹ میں ہیں جبکہ اتوار کو موہنجو دڑو اور لاڑکانہ  گرم ترین مقامات بن گئے جہاں پارہ 53 ڈگری سینٹی گریڈ تک جا پہنچا۔ اسی طرح جیکب آباد میں درجہ حرارت 52 ڈگری کو چھو گیا، محکمہ موسمیات کے مطابق  مزید 5 سے 6 دن تک علاقے میں موسم کی صورتحال برقرار رہے گی۔ ہفتے کے آخر میں، ٹھٹھہ سندھ کا واحد علاقہ تھا جہاں درجہ حرارت 40 ڈگری سے کم تھا۔ محکمہ موسمیات نے پیش گوئی کی ہے کہ اگلے 24 گھنٹوں کے دوران میدانی علاقوں میں ہیٹ ویو کی صورتحال برقرار رہنے کا امکان ہے، ساحلی علاقوں کے لیے گرم اور مرطوب موسم کی پیشگوئی کی گئی ہے۔ کراچی میں بھی رواں ہفتے گرمی کے برقرار رہنے کی توقع ہے ۔درجہ حرارت 40 ڈگری سے تجاوز کرنے کا امکان ہے۔ چیف میٹرولوجسٹ ڈاکٹر سردار سرفراز کے مطابق  29 مئی اور 30 ​​مئی کو ہوا کا رخ تبدیل ہونے کی وجہ سے کراچی میں پارہ 40 ڈگری سینٹی گریڈ تک بڑھنے کا امکان ہے، جبکہ 27 مئی کے بعد سندھ کے بالائی اور وسطی حصوں میں درجہ حرارت قدرے کم ہوجائے گا۔