طارق بشیر چیمہ اور زرتاج گل میں تلخ کلامی

قومی اسمبلی اجلاس کے دوران جب طارق بشیر چیمہ تقریر کررہے تھے تو تحریک انصاف کی رہنما زرتاج گل تواتر کے ساتھ بہاولپور کا تذکرہ کررہی تھیں ۔ وہ طارق بشیر چیمہ کو بہاولپور یونیورسٹی تصویر اسکینڈل کا حوالہ دیتی رہیں۔ تحریک انصاف کے رہنماؤں کے مطابق  طارق بشیر چیمہ اپنی تقریر کے بعد زرتاج گل کی نشست کی طرف بڑھے تھے اور انہوں نے زرتاج گل کو کچھ الفاظ کہے تھے۔پی ٹی آئی رہنما شاہد خٹک کا کہنا ہے کہ طارق بشیر چیمہ نے نشست  پر آکر زرتاج گل کو نازیبا الفاظ کہے، زرتاج گل اسپیکر چیمبر میں رو رہی ہیں۔

طارق بشیر چیمہ کے زرتاج گل کو کہے الفاظ پر سنی اتحاد کونسل کے ارکان آگ بگولہ ہوگئے ۔ سنی اتحاد کونسل کے اراکین طارق بشیر چیمہ کی طرف لپکے تھے۔ دوسری جانب تحریک انصاف کے ایک اور رہنما شیر افضل مروت کا کہنا ہے کہ یہی سوچ رہے ہیں کہ طارق بشیر چیمہ کے خلاف ایف آئی آر درج کرائیں۔ بات گالی تک پہنچ گئی اس میں اخلاقی بات تو رہ نہیں گئی،  یہ ضابطہ فوجداری کے تحت ایک جرم ہے ، طارق بشیر چیمہ لپکے ہیں اور گالیاں دی ہیں، یہ حملہ ہے۔