نومنتخب پنجاب اسمبلی نے حلف اٹھالیا

پنجاب اسمبلی کے نومنتخب ارکان نے حلف اٹھا لیا۔  اب نئے اسپیکر اور ڈپٹی اسپیکر پنجاب اسمبلی کا انتخاب  ہفتے کو خفیہ رائے شماری کے ذریعے ہوگا۔  اجلاس آج اسپیکر سبطین خان کی زیر صدارت شروع ہوا۔ ن لیگی ارکان نے اسپیکر سے حلف لینے کی استدعا کی تاہم اسپیکر نے بغیر حلف لیے اجلاس میں وقفہ کردیا اور کہا کہ پی ٹی آئی کے نامزد وزیراعلیٰ اسلم اقبال کے پروڈکشن آرڈر جاری کررہا ہوں لیکن اس کے باوجود  اسلم اقبال اسمبلی نہ پہنچ سکے۔ ن لیگ اور اتحادیوں کے 215 جبکہ سنی اتحاد کونسل کے 97 ارکان اجلاس میں شریک ہیں۔  حکومتی ارکان کو اسپیکر کے دائیں جانب کی نشستیں الاٹ کی گئی ہیں جبکہ اپوزیشن ارکان اسمبلی کو اسپیکر کے بائیں جانب کی نشستیں الاٹ کی گئی ہیں۔ سنی اتحاد کونسل کو دی گئی نشستیں ابھی تک خالی ہیں۔ اب  اسپیکر اور ڈپٹی اسپیکر کے  لیے کاغذات نامزدگی آج شام 5 بجے سے قبل جمع ہوں گے، جانچ پڑتال بھی آج ہی ہوگی۔