جڑانوالہ واقعہ : 600 سے زائد افراد گرفتار

فیصل آباد کی تحصیل جڑانوالہ میں مسیحی برادری کے گرجا گھروں اور املاک کو نذرآتش  اور حملہ کرنے کے الزام میں پنجاب پولیس نے اب تک 600 سے زائد افراد کو حراست میں لے کر ان کے خلاف دہشت گردی کے 2 مقدمات درج کرلیے ہیں۔ ملزمان کے خلاف مقدمات میں انسداد دہشت گردی اور توہین مذہب سمیت 13 سے زائد دفعات لگادی گئیں۔  پولیس کا دعویٰ ہے کہ اُس نے مسجد سے اعلان کرکے عوام کو مشتعل کرنے والے شخص یاسین کو وائرل ویڈیو کی مدد سے گرفتارکرلیا ہے۔ مختلف  ویڈیوز کے ذریعے دنگا فساد میں ملوث مزید ملزمان کی شناخت اور گرفتاریوں کی کوشش جاری ہے۔ فیصل آباد کی ضلعی انتظامیہ نے تاحکم ثانی دفعہ 144 نافذ کررکھی ہے  اور کشیدہ صورتحال کی وجہ سے جڑانوالہ میں عام تعطیل کا اعلان کیا گیا ہے۔ ضلعی انتظامیہ نے حالات قابو میں رکھنے کے لیے رینجرز کی2 کمپنیاں مختلف مقامات میں تعینات کر دی گئی ہے۔